Суд ЕС адхіліў чарговы пазоў бізнесмена Багалюба Карыча, звязанага з Лукашэнкам

25 верасня, Позірк. Суд ЕС першай інстанцыі (General Court) 24 верасня адхіліў пазоў сербскага бізнесмена Багалюба Карыча, які разам з братам Драгамірам Карычам кантралюе зарэгістраваную ў Мінску будаўнічую кампанію Dana Holdins (“Дана Холдынгс/Дана Астра”). Кампанія з’яўляецца адным з асноўных дэвелапераў і забудоўшчыкаў у Беларусі.

Карыч дамагаўся скасавання ўведзеных у дачыненні да яго санкцый, аргументуючы гэта тым, што Савет ЕС раней нібыта парушыў яго права на эфектыўную судовую абарону. З прычыны гэтага, на думку бізнесмена, ён не можа “вызначыць, на якім крытэрыі ўключэння ў спіс засноўваўся Савет для абгрунтавання захавання абмежавальных мер у дачыненні да яго”. Таксама пазоўнік заявіў, што яму незразумелыя “фактычныя і канкрэтныя прычыны, па якіх яго імя было захавана ў адпаведных спісах”.

У прыватнасці, у пазове Карыч сцвярджаў, што Савет ЕС “не ўказаў канкрэтна кампаніі, з якімі ён нібыта звязаны, характар яго сувязі з гэтымі кампаніямі, а таксама тое, якім чынам ён асабіста здабывае выгаду з рэжыму прэзідэнта Лукашэнкі ці падтрымлівае яго праз гэтыя кампаніі”.

“Што тычыцца праекта “Мінск-Свет”, накіраванага на развіццё шматфункцыянальнага цэнтра “Мінск-Сіці” ў Мінску (Беларусь), і прэферэнцыйнага рэжыму, які, як сцвярджаецца, быў прадастаўлены арганізацыям, якія займаюцца рэалізацыяй гэтага праекта, з боку рэжыму прэзідэнта Лукашэнкі”, то, як сцвярджаў Карыч, Савет ЕС “не назваў кампанію, якая ўдзельнічае ў праекце, і не ўказаў, ці ўдзельнічаў бізнесмен асабіста ў гэтым праекце”.

Таксама бізнесмен заявіў, што “з матывіровачнай часткі рашэння не вынікае характар адносін, з дапамогай якіх ён нібыта здабываў выгаду з рэжыму прэзідэнта Лукашэнкі або падтрымліваў яго, а таксама асобы людзей, з дапамогай якіх гэта адбывалася”.

Усе дадзеныя меркаванні былі адхіленыя судом, такім чынам, санкцыі ЕС у дачыненні да Багалюба Карыча застаюцца ў сіле.

Той жа суд у лістападзе 2024 года таксама адхіліў скаргу Багалюба Карыча на санкцыі ЕС.

Бізнесмен трапіў у санкцыйны спіс ЕС у 2022 годзе.

Еўрапейскі суд (вышэйшая судовая інстанцыя ЕС) у сакавіку гэтага года адмовіўся здымаць санкцыі з кампаніі “Дана Астра”. Згодна з рашэннем суда, кампанія застаецца ў санкцыйным спісе як юрыдычная асоба, якая падтрымлівае рэжым Лукашэнкі і атрымлівае ад яго выгады.

28 жніўня Беларускі расследвальніцкі цэнтр апублікаваў матэрыял, згодна з якім “Дана Холдынгс” змагла пазбегнуць санкцый Еўрасаюза, а замест “структуры, якая валодала будаўнічай бізнес-імперыяй сям’і Карычаў, вядомых маштабнымі будоўлямі ў Мінску і сувязямі з сям’ёй Аляксандра Лукашэнкі”, пад абмежаванні ЕС трапіла “фірма-клон з рэгістрацыяй у Мінску”.

21 жніўня 2025 года эканамічныя абмежаванні з “Дана Холдынгс” знялі ЗША. У расследаванні ўказваецца, што за два месяцы да гэтага, 20 чэрвеня, кампанію ліквідавалі. “Гэта магло стаць прычынай для выключэння яе з санкцыйнага спісу”, — прыводзіў БРЦ каментарый брытанскага адваката, кіраўніка праекта State Capture Accountability Project Алекса Прэзанці.

“Дана Холдынгс” была зарэгістраваная Мінгарвыканкамам 23 кастрычніка 2007 года, на Кіпры — 20 лютага 2013 года.

Увосень 2020 года выданне EU Observer апублікавала расследаванне аб маёмасных сувязях Dana Holdings з сынам Аляксандра Лукашэнкі Віктарам і яго жонкай Ліліяй Лукашэнка праз кіпрскія афшорныя кампаніі.

17 снежня 2020 года Савет ЕС унёс кампанію ў санкцыйны спіс. Пазней яна трапіла пад санкцыі Вялікабрытаніі, Швейцарыі, Албаніі, Ісландыі, Ліхтэнштэйна, Нарвегіі, Паўночнай Македоніі, Чарнагорыі, якія далучыліся да новых пакетаў санкцый. У сакавіку 2023 года “Дана Холдынгс/Дана Астра” трапіла ў санкцыйны спіс Японіі.