У Вярхоўным судзе пачалі судзіць за генацыд памерлага вайсковага злачынцу Ярмольчыка
20 кастрычніка, Позірк. Крымінальную справу кіраўніка падраздзялення дапаможнай паліцыі часоў нацысцкай акупацыі Аляксандра Ярмольчыка 20 кастрычніка пачаў разглядаць Вярхоўны суд, паведамляе прэс-служба Генеральнай пракуратуры.
Паводле слоў дзяржабвінаваўцы Наталлі Сакаловай, з восені 1941 па 1943 год Ярмольчык “знаходзіўся на тэрыторыі БССР, кіраваў і непасрэдна браў удзел у карных аперацыях, здзейсніў жорсткія забойствы не менш як 247 жыхароў Беларусі, у тым ліку старых, жанчын і дзяцей, то бок людзей, якія не маглі ўчыніць супраціў карнікам”.
Пасля “адступлення нямецка-фашысцкіх захопнікаў”, адзначыла прадстаўнік Генпракуратуры, Ямольчык жыў на тэрыторыі ФРГ пад імем Альберт Кругер. Памёр Ярмольчык 27 лістапада 1984 года, “не атрымаўшы пакарання за здзейсненае злачынства”.
У 1960-х — 1970-х гадах, паводле інфармацыі нагляднага органа, Ярмольчыка “спрабавалі прыцягнуць да крымінальнай адказнасці ў Германіі”, але “нямецкая Феміда доўга разглядала гэтую справу”. “Завяршыць гэты працэс і аднавіць гістарычную справядлівасць трэба будзе беларускаму правасуддзю”, — заявіла ведамства.
У 2021 годзе быў прыняты закон “Аб генацыдзе беларускага народа” (у красавіку таго ж года была ўзбуджаная крымінальная справа па факце генацыду беларускага народа). Пры гэтым пад беларускім народам “для мэтаў гэтага закона разумеюцца савецкія грамадзяне, якія пражывалі на тэрыторыі Беларускай Савецкай Сацыялістычнай Рэспублікі ў перыяд Вялікай Айчыннай вайны і (або) пасляваенны перыяд” (да 31 снежня 1951 года).
За “адмаўленне генацыду беларускага народа” арт. 1302 КК прадугледжвае адказнасць у выглядзе 5 гадоў зняволення, за паўторнае парушэнне закона — ад 3 да 10 гадоў пазбаўлення волі.
17 ліпеня 2023 года Аляксандр Лукашэнка падпісаў закон “Аб змене Крымінальна-працэсуальнага кодэкса”, які дазваляе пераследваць памерлых у крымінальным парадку.
18 сакавіка 2024 года Вярхоўны суд прызнаў вінаватым паводле арт. 127 украінца Уладзіміра Катрука, якога абвінавацілі ў спаленні вёскі Хатынь. З прычыны яго смерці ў 2015 годзе пакаранне прызначанае не было.
30 снежня таго ж года ВС прызнаў вінаватым паводжле арт. 127 без прызначэння пакарання карніка Хатыні Канстанціна Смоўскага.
28 сакавіка 2025 года ВС прызнаў памерлага ў Вялікабрытаніі ў 1997 годзе Сямёна Серафімавіча вінаватым паводле арт. 127.
17 кастрычніка 2025 года ВС прызнаў вінаватым у генацыдзе камандзіра першай роты 118-га батальёна ахоўнай паліцыі нябожчыка Осіпа Вінніцкага, які “наўмысна пазбавіў жыцця не менш за 403 чалавек, уключаючы не менш за 146 дзяцей, у тым ліку цяжарных жанчын, малалетніх, людзей сталага веку”.
