Літоўскія службы будуць жорстка рэагаваць на інцыдэнты з кантрабандай з Беларусі — прэм’ер

23 кастрычніка, Позірк. Калі ў Літве будуць бачыць “варожыя дзеянні”, як кантрабанда з Беларусі свабодна перасякае мяжу, службы краіны будуць рэагаваць “жорстка, тут і цяпер”, заявіла ў эфіры Žinių radijas прэм’ер-міністр гэтай балтыйскай дзяржавы Інга Ругінене.

На фоне свабоднага пралёту з беларускай ў літоўскую паветраную прастору аэрастатаў з кантрабандай кіраўнік урада, словы якой перадае партал навін Delfi, папярэдзіла, што перамоў з Беларуссю не будзе.

“Гэта не тая краіна, з якой можна размаўляць і весці перамовы. Усе разумеюць, што большую частку шароў можна было б затрымаць яшчэ на тэрыторыі самой Беларусі. Калі наша суседняя краіна гэтага не робіць, то і з нашага боку павінна быць адпаведная рэакцыя”, — падкрэсліла Ругінене.

Паведамляецца, што са студзеня па верасень 2025 года 80,1% кантрабандных цыгарэт, якія трапілі ў Літву з Беларусі, былі дастаўленыя па паветры — з выкарыстаннем паветраных шароў або іншых беспілотных лятучых апаратаў. Агулам сёлета перахоплена больш за 1,1 млн пачкаў цыгарэт, дастаўленых па паветры, з іх каля 800 тыс. пачкаў — з дапамогай паветраных шароў.

22 кастрычніка Літва ўручыла часоваму паверанаму ў справах Беларусі ноту пратэсту ў сувязі з “неаднаразовымі і частымі парушэннямі паветранай прасторы Рэспублікай Беларусь”. МЗС балтыйскай дзяржавы папярэдзіла, што ў выпадку паўторных незаконных парушэнняў Літва пакідае за сабой права зрабіць “адпаведныя захады ў адказ”.

У выпадку яшчэ аднаго масавага залёту на тэрыторыю Літвы паветраных шароў з кантрабандай мяжа з Беларуссю будзе закрытая, заявіла 22 кастрычніка Ругінене. Пра перспектывы закрыцця мяжы з Беларуссю “на больш працяглы тэрмін” праз інцыдэнт з аэрастатамі ў той жа дзень заявіў галоўны дарадца прэзідэнта Літвы Дэйвідас Матулёніс.

У ноч на 22 кастрычніка ў Літву з боку Беларусі масава заляцелі паветраныя шары, якія кантрабандысты звычайна выкарыстоўваюць для дастаўкі цыгарэт. Паведамлялася, што агулам ў Літве знойдзена восем шароў, затрыманы адзін чалавек.

Праз палёт паветраных шароў прыпыняў працу Вільнюскі аэрапорт. Паводле слоў прадстаўніка аэрапорта Віталя Рочэ, пацярпела больш за 4 тыс. пасажыраў, рэйсы якіх перанеслі або скасавалі.

Праз метэазонды, якія прыляцелі з боку Беларусі, Літва закрывала мяжу.

Партал Delfi са спасылкай на кіраўніка Службы аховы дзяржмяжы Літвы Рустама Любаева паведаміў, што ў Літву прыляцелі не дзясяткі, а сотні метэазондаў з кантрабанднымі цыгарэтамі. “Згодна з інфармацыяй вайскоўцаў, метэазондаў было каля 200”, — заявіў кіраўнік ведамства.