Суд у Гомелі абавязаў супрацоўнікаў універсітэта выплаціць 126 тыс. рублёў у якасці “кампенсацыі выдаткаў за навучанне адлічаных студэнтаў”

30 кастрычніка, Позірк. Суд Чыгуначнага раёна Гомеля спагнаў з начальніка факультэта і кіраўніка юрыдычнай службы гомельскага ўніверсітэта больш за 126 тыс. рублёў, паведамляе Генеральная пракуратура.

З пазовам у суд звярнуўся “транспартны пракурор”, адзначае нагляднае ведамства. Гэта можа сведчыць, што адказчыкамі выступілі супрацоўнікі Беларускага дзяржаўнага ўніверсітэта транспарту.

У паведамленні гаворыцца, што пазоўная заява тычылася кампенсацыі прычыненай шкоды дзяржаве, якая “ўтварылася ў выніку непрыняцця захадаў па кампенсацыі выдаткаў за навучанне з адлічаных студэнтаў”.

Паводле звестак пракуратуры, у 2014–2018 гадах “з аднаго з факультэтаў універсітэта было адлічана 9 студэнтаў”, яны “адмовіліся ў добраахвотным парадку кампенсаваць грашовыя сродкі, затрачаныя дзяржавай на іх навучанне”.

“У сваю чаргу начальнік факультэта з прычыны неналежнага выканання сваіх абавязкаў працу па кампенсацыі выдаткаў за навучанне экс-студэнтаў і іх спагнанню з 2011 па 2023 гады не праводзіў. Начальнік юрыдычнай службы не пракансультаваў калегу аб неабходнасці, парадку і механізме спагнання такіх сродкаў. Ён таксама не выканаў абавязкі па падрыхтоўцы неабходных дакументаў па абароне маёмасных інтарэсаў дзяржавы ў судзе”, — заяўляе ведамства.

У выніку, як адзначаецца, непрыняцце захадаў прывяло да “немагчымасці кампенсацыі гэтай шкоды з адлічаных з прычыны заканчэння тэрмінаў пазоўнай даўнасці”.