МАРГ справаздачыўся аб нарыхтоўцы 96,4% баршчавога набору на міжсезонны перыяд

10 лістапада, Позірк. “Праблемныя пытанні фарміравання стабфондаў” абмеркавала намеснік міністра антыманапольнага рэгулявання і гандлю Святлана Караткевіч 10 лістапада на нарадзе з удзелам прадстаўнікоў Міністэрства сельскай гаспадаркі і харчавання, аблвыканкамаў, Мінгарвыканкама, гандлёвых сетак і вытворцаў плодаагародніннай прадукцыі.

Як паведамляе прэс-служба МАРГ, па выніках нарады “абазначаныя канкрэтныя задачы для далейшай працы і выканання пастаўленых мэтаў”.

“На міжсезонны перыяд 2025/2026 гадоў патрэба ў баршчавым наборы складае 148,78 тыс. т. Па стане на 17:30 10.11.2025 ужо закладзена 147,91 тыс. т. або 96,4% ад агульнай патрэбы”, — гаворыцца ў рэлізе.

У ведамстве нагадалі, што на плодаагароднінную прадукцыю ў рамках дзяржзаказу ўстаноўлены гранічныя максімальныя рознічныя цэны: на бульбу — 1,07 рублёў за кілаграм, буракі — 1,17, моркву — 1,35, капусту — 1,62, цыбулю — 1,68, яблыкі свежыя — 4,80.

Пры гэтым са спасылкай на Дзяржаўны стандарт паведамляецца аб “дапушчальным” памеры бульбы для рэалізацыі — 45–80 мм. Раней, як заяўляецца, гэты параметр быў устаноўлены на ўзроўні 35–80 мм.

Гранічныя максімальныя цэны на баршчэвы набор і яблыкі пры пастаўцы юрыдычным асобам, нарыхтоўшчыкам вызначаныя пастановай Савета міністраў № 93 ад 29 верасня.

Паведамлялася, что максімальныя цэны, па якіх вытворцы могуць прадаваць прадукцыю “ў мэтах выканання імі дагавораў пастаўкі са стабілізацыйных фондаў тавараў для рэспубліканскіх дзяржаўных патрэбаў (без уліку выдаткаў на захоўванне)”, наступныя:

• свежая харчовая бульба: без уліку выдаткаў на дастаўку — 0,63 рубля за 1 кг, з улікам выдаткаў на дастаўку — 0,66 рубля за 1 кг;
• свежыя сталовыя буракі: 0,66 і 0,69 адпаведна;
• свежая сталовая морква: 0,75 і 0,79;
• свежая белакачанная капуста: 0,94 і 0,98;
• рэпчатая цыбуля: 1 і 1,05;
• свежыя яблыкі: 2,6 і 2,73.

Максімальныя цэны на прадукцыю, якая пастаўляецца нарыхтоўшчыкам для выканання дзяржаўнай замовы (з улікам выдаткаў на захоўванне, без ПДВ), з 15 лістапада будуць такія:

• бульба: без уліку выдаткаў на дастаўку — 0,68 рубля за 1 кг, з улікам выдаткаў на дастаўку — 0,71 рубля за 1 кг;
• буракі: 0,74 і 0,78 адпаведна;
• морква: 0,86 і 0,9;
• капуста: 1,03 і 1,08;
• цыбуля: 1,07 і 1,12;
• яблыкі: 3,05 і 3,2.

Дакумент прыняты на падставе палажэнняў, прапісаных у пастанове ўрада № 399 ад 22 ліпеня. Той акт вызначыў, што ў міжсезонны перыяд 2025–2026 гадоў са стабілізацыйных фондаў для дзяржаўных патрэбаў будзе пастаўлена 148,78 тыс. тон садавінагароднінай прадукцыі (у гандлёвыя сеткі — 110,84 тыс. т, ва ўстановы сацыяльнай сферы — 37,94 тыс. т).

Напрыклад, пастаўкі бульбы і яблыкаў запланаваныя ў аб’ёме 58,85 і 26,81 тыс. т адпаведна.

23 ліпеня Караткевіч заявіла, што ведамства і ўрад “зрабілі пэўныя высновы” і “выпрацавалі шэраг захадаў”, якія “ў будучым маглі б выключыць магчымыя праблемы з бульбай у крамах ужо з улікам ураджаю 2025 года”.

Караткевіч нагадала, што ў адпаведнасці з указам № 232 “Аб асаблівасцях пастаўкі садавінагароднінай прадукцыі для рэспубліканскіх дзяржаўных патрэбаў” стабілізацыйныя фонды пераходзяць у сістэму дзяржзамовы.

Чыноўніца звярнула ўвагу, што за невыкананне абавязацельстваў для юрыдычных асоб прадугледжаная адміністрацыйная адказнасць — штраф да 200 базавых велічынь (8.400 рублёў), для фізічных асоб — да 12 базавых велічынь (504 рублі).

Шырокі грамадскі рэзананс увесну выклікала адсутнасць бульбы ў крамах, а таксама высокія кошты на гэты караняплод.

8 траўня Аляксандр Лукашэнка прызнаў дэфіцыт бульбы, пазней ён зрабіў наконт гэтага некалькі заяў. У прыватнасці, звязаў недахоп прадукта ў Беларусі з палітыкай.

12 ліпеня Лукашэнка падпісаў закон, які прадугледжвае штраф за адсутнасць у продажы гародніны і садавіны. У дакуменце прапісаная адказнасць пастаўшчыкоў і гандлёвых сетак за “невыкананне абавязкаў па пастаўцы плодаагародніннай прадукцыі”. За “непастаўку” або “недапастаўку” гэтай прадукцыі “на падставе адпаведнай дамовы са стабілізацыйных фондаў тавараў для рэспубліканскіх патрэбаў”, а таксама за “яе адсутнасць у гандлёвым аб’екце ў міжсезонны перыяд” прадугледжаны штраф — ад 5 да 200 базавых велічынь (ад 210 да 8.400 рублёў).