Генпракуратура распачала 16 спраў за сістэмную карупцыю ў перапрацоўчай галіне і энергетыцы
25 лістапада, Позірк. Факты сістэмнай карупцыі і подкупу “службовых ды іншых асоб” дзяржаўных арганізацый перапрацоўчай і энергетычнай галін выяўленыя ў выніку праверкі, якую Генеральная пракуратура правяла разам з шэрагам сілавых структур.
Паводле інфармацыі нагляднага органа, у праверцы ўдзельнічалі супрацоўнікі Упраўлення па барацьбе з эканамічнымі злачынствамі Крымінальнай міліцыі Галоўнага ўпраўлення ўнутраных спраў Мінгарвыканкама і АБЭЗ трох раёнаў Мінска — Ленінскага, Першамайскага і Цэнтральнага.
У выніку распачата 16 крымінальных спраў паводле арт. 430 (атрыманне хабару), арт. 431 (перадача хабару), арт. 433 (незаконнае ўзнагароджанне) і арт. 210 (крадзеж шляхам злоўжывання службовымі паўнамоцтвамі) Крымінальнага кодэкса.
Адзначаецца, што “выкрытыя злачынныя схемы” крадзяжоў, хабарніцтва і перадачы незаконных узнагароджанняў службовым асобам за “спрыяльнае вырашэнне пытанняў”, у прыватнасці, пра выбар “канкрэтнага прадпрыемства ў якасці пастаўшчыка прадукцыі, заключэння з ім адпаведных дагавораў і іх аплаце”, “вызначэнне пэўных прыватных юрыдычных асоб і індывідуальных прадпрымальнікаў у якасці падрадчыка па аднаўленні працы аўтаматызаванай сістэмы камерцыйнага ўліку электраэнергіі з усталяваннем праграмнага забеспячэння і садзейнічанне ў аплаце выкананых работ”, а таксама “прыёмку электрасетак на аб’ектах будаўніцтва, паскарэнне працэсу ўсталявання пунктаў пераключэння кабеляў, правядзенне выпрабаванняў і прыёмку аб’екта будаўніцтва”.
Генпракуратура сцвярджае, што “памер незаконных узнагароджанняў і хабараў” вызначаўся фактычнай сумай грошай, што паступілі ад замоўцаў (да 2% сумы заказу), аб’ёмаў і частаты адгрузкі, а таксама своечасовасці аплаты і складаў ад 300 рублёў да 2.000 долараў. Пры гэтым “сума выкрадзенага шляхам злоўжывання службовымі паўнамоцтвамі” перавысіла 15 тыс. рублёў.
Заяўляецца, што дзесяць падазраваных “цалкам прызналі факты перадачы і атрымання хабару, абавязаліся кампенсаваць атрыманы злачынным шляхам даход”.
Паводле даных Вярхоўнага суда, якія раней прыводзіў “Позірк”, у студзені — чэрвені 2025 года за здзяйсненне карупцыйных злачынстваў асуджана 304 чалавекі — на 7,3% менш, чым за той жа перыяд 2024-га (328). З іх 84 прыгавораныя да пазбаўлення волі.
