Пасля пажару ў Століне шпіталізавана дзесяць чалавек — сем дзяцей і трое дарослых

20 снежня, Позірк. Дзесяць чалавек шпіталізавана ў Століне (Брэсцкая вобласць) пасля пажару, які адбыўся 20 снежня ў адным з дамоў на вул. Гагарына, вынікае з паведамлення прэс-службы Міністэрства аховы здароўя.

Паводле інфармацыі ведамства, сярод іх трое дарослых і сем дзяцей (пяць — ва ўзросце 3–8 гадоў, два — больш за 15 гадоў).

“Урачы Столінскай ЦРБ правялі дыягнастычныя агляды і прызначылі лячэнне ўсім дзецям і дарослым”, — гаворыцца ў паведамленні.

Апісваючы вядомыя дэталі здарэння, Мінздароўя спаслалася на мясцовы тэлеграм-канал “Столінскі раён”. Паводле звестак гэтай крыніцы, узгаранне адбылося ў кватэры на 3-м паверсе, у жыллі на 4-м і 5-м паверхах было задымленне.

Рэсурс адзначыў, што стан людзей, якія трапілі ў бальніцу, “сярэдняй цяжкасці і здавальняльны”, пры гэтым на момант агляду пагрозы жыццю не было.