У 2025 годзе на аб’ектах АПК пацярпела або было знішчана 53 адзінкі тэхнікі
10 студзеня, Позірк. Два апошнія выпадкі знішчэння тэхнікі на аб’ектах аграпрамысловага комплексу адбылося ў апошні тыдзень 2025 года, вынікае з сутачных зводак Міністэрства па надзвычайных сітуацыях.
26 снежня ля вёскі Канчаны (Бераставіцкі раён Гродзенскай вобласці) згарэў кормаўборачны камбайн, а 30 снежня ў аднапавярховым цагляным будынку па рамонце сельскагаспадарчай тэхнікі на тэрыторыі мехдвара ў аграгарадку Знаменка (Брэсцкі раён) — франтальны пагрузчык.
Пра першы летась падобны выпадак паведамлялася 9 студзеня. Гарэў трактар ”МТЗ-82″ з прычэпам, які працаваў у полі ля вёскі Мадора (Рагачоўскі раён Гомельскай вобласці).
Згодна з праведзеным “Позіркам” аналізам даных МНС, у 2025 годзе пацярпела або было знішчана сама меней 53 адзінкі тэхнікі. Гэта на 27,4% менш, чым за 2024 год (мінімум 73).
За пяць гадоў у Беларусі істотна зменшылася колькасць асноўных відаў тэхнікі, машын і абсталявання ў сельскагаспадарчых арганізацыях, паказаў праведзены “Позіркам” аналіз даных Нацыянальнага статыстычнага камітэта.
Стала менш камбайнаў: збожжаўборачных — на 14,6% (з 8.798 на канец 2019 года да 7.514 на канец 2024-га), бульбаўборачных — на 32,9% (з 778 да 522), буракаўборачных — на 27,5% (з 298 да 216), кормаўборачных — на 11,6% (з 4.138 да 3.660), ільноўборачных — на 30,1% (з 428 да 299).
Колькасць трактароў у гаспадарках зменшылася на 9,6% (з 38.966 да 35.241), грузавых аўтамабіляў — на 14,8% (з 17.873 да 15.228).
Даільных установак і агрэгатаў стала менш на 15,4% (з 10.758 да 9.096), бульбакапальнікаў — на 35,3% (з 1.254 да 811), бульбасаджалак — на 28% (з 1.198 да 862), зернеачышчальных машын — на 12,7% (з 6.939 да 6.059), зернеачышчальна-сушыльных комплексаў — на 19,6% (з 2.559 да 2.057).
