У “спіс экстрэмістаў” унесена яшчэ 30 чалавек, сярод іх дзве палітзняволеныя

16 студзеня, Позірк. У спіс “асоб, якія маюць дачыненне да экстрэмісцкай дзейнасці”, 16 студзеня дададзена яшчэ 30 чалавек. Цяпер у размешчаным на сайце Міністэрства ўнутраных спраў пераліку 6.205 пазіцый.

Спіс папоўнілі асуджаныя паводле арт. 361⁴ Крымінальнага кодэкса палітзняволеныя — мастачка Аксана Шаляпіна (асуджаная на 3 гады пазбаўлення волі) і Алена Добыш (тэрмін невядомы).

Шаляпіна асуджаная за дапамогу некалькім дзясяткам палітвязняў, калі тыя былі пад вартай. Добыш затрыманая ў сакавіку 2025 года па “справе Беларускага Гаюна”.

З пазнакай “адбываюць пакаранне” ў спісе фігуруюць Сяргей Кузняцоў, Сяргей Лагвіновіч, Максім Нікіценка, Максім Дударга, Міхаіл Палазнік (усе — арт. 361⁴), Канстанцін Дзмітрыеў, Аляксандр Канавальчык (абодва — арт. 361⁴, 130), Аляксей Шыловіч (арт. 368, 361⁴), Ганна Старацітарава (арт. 130¹).

Дзмітрый Богуш (арт. 130) вызвалены ад адказнасці ў сувязі з заканчэннем тэрмінаў прыцягнення, вынікае з пазнакі.

Насупраць прозвішчаў астатніх стаіць пазнака “судзімасць не пагашаная”, што, як правіла, азначае пакаранне, звязанае з абмежаваннем, а не пазбаўленнем волі. Гэта асуджаныя паводле арт. 361⁴ Яўген Стралкоўскі, Вячаслаў Прус, Ілля Васечак, Ганна Кухарчык, Дзмітрый Царук, Дзяніс Пятроў, Павел Шумскі, Аляксандр Рудскі, Андрэй Канапацкі, Аляксей Ермаловіч, Аляксей Мароз, Дзмітрый Захараў, Канстанцін Анішчанка, Наталля Галоўка, Андрэй Янкавец, Сяргей Цыганкоў, Аляксей Кісель, а таксама Іван Нікіпарцоў (арт. 341 КК).

Даведка “Позірку”:

• артыкул 130 КК — распальванне расавай, нацыянальнай, рэлігійнай або іншай сацыяльнай варожасці або варожасці;
• арт 130¹ — рэабілітацыя нацызму;
• арт. 341 — апаганенне збудаванняў і псута маёмасці;
• арт. 361⁴ — садзейнічанне экстрэмісцкай дзейнасці;
• арт. 368 — абраза прэзідэнта, у тым ліку таго, што спыніў выкананне сваіх паўнамоцтваў.