Шэраг вайсковых часцей Заходняга аператыўнага камандавання прыводзіцца ў боегатоўнасць — новы этап праверкі
16 лютага, Позірк. Пра прывядзенне ў баявую гатоўнасць шэрагу злучэнняў і вайсковых часцей Заходняга аператыўнага камандавання паведаміла 16 лютага прэс-служба Міністэрства абароны.
Планамі камандавання прадугледжана “пастаўка мабілізацыйных рэсурсаў у вайсковыя фарміраванні, што трапілі пад праверку”.
Мінабароны чакае, што праверка дазволіць ацаніць “узровень баявой і мабілізацыйнай гатоўнасці, здольнасць камандзіраў кіраваць падпарадкаванымі вайсковымі часцямі, стан узбраення, вайсковай і спецыяльнай тэхнікі”.
У ходзе праверкі ваеннаабавязаныя змогуць “аднавіць свае веды і навыкі”. З імі будуць праведзеныя “заняткі па прадметах баявой падрыхтоўкі, у тым ліку па агнявой і медыцынскай”.
Асаблівую ўвагу плануецца надаць пытанням “падвышэння жывучасці падраздзяленняў ва ўмовах актыўных дзеянняў дыверсійна-выведніцкіх груп умоўнага праціўніка і беспілотнай авіяцыі”.
4 лютага Міністэрства абароны паведамляла, што да праверкі боегатоўнасці прыцягнутыя афіцэры запасу.
Пра пачатак “планавай” комплекснай праверкі боегатоўнасці вайсковых часцей і падраздзяленняў міністр абароны Віктар Хрэнін абвясціў 26 студзеня. Яна была абвешчаная паралельна з раптоўнай праверкай боегатоўнасці арміі, якая распачалася 16 студзеня на даручэнне Аляксандра Лукашэнкі — у абход Мінабароны.
2 лютага Мінабароны паведаміла, што ў рамках “нарошчвання мерапрыемстваў комплекснай праверкі баявой гатоўнасці” Узброеных сіл прыведзеная ў “гатоўнасць да выканання задач па прызначэнні” адна з вайсковых часцей Заходняга аператыўнага камандавання. Што гэта за частка, не ўдакладнялася.
Гл. таксама:
Радзіма ў небяспецы, вакол ворагі. Навошта Лукашэнка бясконца правярае боегатоўнасць войска (на рускай мове)
