Лукашэнка: Няма той сілы, што здольная адарваць Беларусь ад Расіі

16 лютага, Позірк. У свеце “няма той сілы, што здольная адарваць Беларусь ад Расіі і Расію ад Беларусі”, заявіў Аляксандр Лукашэнка 16 лютага на сустрэчы з дзяржаўным сакратаром Саюзнай дзяржавы Сяргеем Глазьевым.

“У Расіі некаторыя кажуць, што нехта спрабуе адарваць Беларусь ад Расіі, — цытуе спікера неафіцыйны тэлеграм-канал яго прэс-службы. — Абставіны так склаліся, што яны нас разам звязалі, напэўна, на доўгія-доўгія дзесяцігоддзі і стагоддзі”.

Палітык таксама падкрэсліў, што збіраецца “абмеркаваць з кіраўніцтвам Злучаных Штатаў Амерыкі” захоп па факце ўжо былога прэзідэнта Венесуэлы Нікаласа Мадуры.

“Правялі нейкую аперацыю, схапілі чалавека. Ну і што? Усяму свету паказалі, хто ёсць кім. А галоўнае — што далей? Я маю прапановы па выхадзе з гэтай сітуацыі. І калі яны хочуць годна і прыгожа выйсці з гэтай сітуацыі, мы гатовыя з [прэзідэнтам ЗША] Дональдам [Трампам] у гэтым плане працаваць”, — сказаў Лукашэнка, падкрэсліўшы што і ён, і амерыканскі лідар з’яўляюцца “прагматычнымі людзьмі”.

Закрануўшы тэму “Савета міру”, якая фармуецца з ініцыятывы Трампа, спікер адзначыў, што Беларусь “абавязкова на ўзроўні прэзідэнта” будзе ў ім удзельнічаць: “Можа, не ў Вашынгтоне, а недзе ў Еўропе ці на Блізкім Усходзе, можа быць, у Ізраілі, бліжэй тут, у Турцыі, адбудуцца далейшыя пасяджэнні гэтага савета — мы будзем удзельнічаць у ім. У нас сцяг адзін — мір. Мы хочам міру. І найперш там, дзе наш лёс — Украіна”.

9 лютага Служба знешняй выведкі (СЗВ) Расіі заявіла, што заходнія краіны плануюць правесці “пільную “інвентарызацыю” беларускіх апазіцыйных кадраў на прадмет іх выкарыстання ў падрыўной дзейнасці”. Акрамя таго, паводле сцвярджэння спецслужбы, Захад спадзяецца “аслабіць повязь Мінска і Масквы ў рамках Саюзнай дзяржавы і ўскладніць дасягненне мэтаў спецаперацыі” (відавочна, гаворка пра развязаную РФ вайну супраць Украіны, у якой рэжым Лукашэнкі падтрымлівае Крэмль).

12 лютага прэс-сакратар МЗС РФ Марыя Захарава заявіла, што Расія “не будзе назіраць склаўшы рукі” за тым, як Захад спрабуе “адарваць Беларусь ад Расіі”.

“Прынцыповую палітычную ацэнку” гэтым заявам прадстаўнікоў Расіі, якія могуць сведчыць пра “падрыхтоўку да канчатковай ліквідацыі суверэнітэту Беларусі”, на наступны дзень даў Аб’яднаны пераходны кабінет (АПК).

Намеры расійскага боку “не назіраць склаўшы рукі” за працэсамі ў Беларусі, паводле ацэнкі АПК, “з’яўляюцца прамой пагрозай нацыянальнай бяспецы і сведчаць пра пераход Крамля да палітыкі адкрытага дыктату”.

Падобныя заявы, падкрэсліла палітычная структура, ёсць “грубым умяшаннем ва ўнутраныя справы Рэспублікі Беларусь і беспрэцэдэнтным сігналам пра поўнае непрызнанне Расіяй суверэннага права беларускага народа самастойна вызначаць сваю будучыню”.

“Мы падкрэсліваем: менавіта імперская палітыка Расійскай Федэрацыі і яе імкненне замацаваць Беларусь у статусе бяспраўнага сатэліта з’яўляюцца сёння галоўнай пагрозай суверэнітэту і незалежнасці нашай краіны”, — адзначалася ў заяве АПК.

Грамадства Палітыка

Грамадства, Палітыка

Новым дзяржсакратаром Саюзнай дзяржавы прызначаны Сяргей Глазьеў — прыхільнік "адраджэння імперыі" (дапоўнена)

актуалізаваны загаловак, дададзеныя абзацы 3–4 і 6–11 17 красавіка, Позірк. Новым дзяржаўным сакратаром Саюзнай дзяржавы прызначаны Сяргей Глазьеў, які дагэтуль займаў пасаду намесніка кіраўніка сакратарыята, паведамляюць дзяржСМІ па выніках сустрэчы Аляксандра Лукашэнкі са згаданым чыноўнікам 17 красавіка ў Мінску. "Мы дамовіліся з …

Чытаць