Ветэрынарная служба Латвіі заклікала не набываць хатніх жывёл у Беларусі

17 лютага, Позірк. Харчова-ветэрынарная служба (ХВС) Латвіі 17 лютага заклікала жыхароў краіны не набываць сабак, катоў і хатніх тхароў у Беларусі і Расіі.

Як адзначаецца на сайце ХВС, папярэджанне выклікана тым, што на мінулым тыдні ў Германіі быў пацверджаны выпадак шаленства ў сабакі, завезенай у ЕС з Расіі ў лістападзе 2025 года праз латвійскі памежны пункт пропуску на мяжы.

Пры гэтым у жывёлы былі ўсе неабходныя суправаджальныя дакументы, уключаючы тэст на цітр антыцелаў да шаленства, які пацвярджае эфектыўнасць вакцынацыі супраць гэтага захворвання.

Ветслужба паведамляе, што шаленства — небяспечнае і смяротнае захворванне як для жывёл, так і для людзей. Яно мае працяглы інкубацыйны перыяд (да 6 месяцаў), цягам якога ў жывёл яшчэ не назіраюцца клінічныя прыкметы, і яны выглядаюць здаровымі. Таму пры перамяшчэнні жывёл кантрольныя службы могуць абапірацца толькі на суправаджальныя дакументы, якія павінны гарантаваць, што жывёла вакцынаваная і нікому не пагражае.

У дадзеным выпадку сабака была ўвезена ў Германію ў лістападзе 2025 года, а прыкметы захворвання і дыягназ былі ўстаноўлены ў лютым 2026-га.

У адпаведнасці з пастановай Еўракамісіі ад 19 красавіка 2024 года, з 16 верасня 2024-га для ўвозу на тэрыторыю ЕС з Беларусі і Расіі хатніх сабак, катоў і тхароў неабходна прад’яўляць вынікі тэсту на цітраванне антыцелаў да віруса шаленства.

Абгрунтаваннем прынятага рашэння ЕК называла “неаднаразовыя парушэнні, выяўленыя нацыянальнымі ўладамі ў пунктах увозу ў ЕС у дачыненні да хатніх сабак, катоў і тхароў, якія перамяшчаюцца з Беларусі і Расіі”. Такія парушэнні, на думку камісіі, “выклікаюць значныя сумневы адносна пастаяннага і эфектыўнага прымянення і рэалізацыі правіл па прафілактыцы і барацьбе з шаленствам, гарантаваных кампетэнтнымі органамі гэтых краін, а таксама адносна дакладнасці афіцыйных сертыфікатаў, выдадзеных на іх узроўні”.

Улічваючы “значную пашыранасць выпадкаў невыканання патрабаванняў, якія датычацца статусу антырабічнай вакцынацыі хатніх жывёл і дакладнасці яе сертыфікацыі, выключэнне для хатніх сабак, катоў і тхароў, якія паходзяць з Беларусі і Расіі, ад праходжання тэсту на цітраванне антыцелаў да шаленства перад уездам на тэрыторыю ЕС выклікае значныя асцярогі наконт рызыкі заносу шаленства на тэрыторыю Саюза ў выніку некамерцыйнага перамяшчэння такіх хатніх жывёл”, заяўлялі ў ЕК.

Акрамя таго, указваецца ў дакуменце, “неспрыяльная эпідэміялагічная сітуацыя ў Беларусі і Расіі, дзе шаленства па-ранейшаму прысутнічае і рэгулярна выяўляецца ў сабак і катоў, што пацвярджаецца інфармацыяй, сабранай на міжнародным узроўні Сусветнай арганізацыяй аховы здароўя жывёл, спрыяе далейшаму павелічэнню рызыкі заносу шаленства ў Саюз”.

У Беларусі згаданы аналіз праводзіцца не раней чым праз 30 дзён пасля апошняй вакцынацыі ад шаленства і не пазней чым за два месяцы да заканчэння тэрміну дзеяння вакцыны. Цітр антыцелаў у сыроватцы крыві жывёлы павінен быць не менш за 0,5 МЕ/мл. Пры ніжэйшым паказчыку цітру антыцелаў да віруса шаленства неабходна зрабіць паўторную вакцынацыю жывёле, пасля якой, не менш чым праз 30 дзён, паўтарыць тэст. Жывёла павінна быць не маладзейшая за чатыры месяцы.

Аналіз павінен быць зроблены не менш чым за тры месяцы да перасячэння мяжы.