Вайскоўцы рэгулярна прымяняюць авіяцыю і ЗРК для збіцця беспілотнікаў, якія залятаюць у Беларусь — камандуючы ВПС і СПА

20 лютага, Позірк. Беларускія вайскоўцы рэгулярна прымяняюць авіяцыю і зенітныя ракетныя комплексы для знішчэння беспілотнікаў, якія залятаюць у Беларусь, вынікае з каментарыя дзяржСМІ камандуючага ВПС і войскамі СПА Андрэя Лук’яновіча.

Паводле яго слоў, у свеце зараз “складваецца няпростая ваенна-палітычная абстаноўка, са слабымі ніхто не лічыцца, а Беларусь — моцная краіна”.

“Асаблівую ролю, вядома, адыгрываюць ваенна-паветраныя сілы і войскі супрацьпаветранай абароны, якія штодня нясуць баявыя дзяжурствы па супрацьпаветранай абароне і першыя сустракаюць на паветраных рубяжах любога праціўніка”, — сказаў военачальнік.

Вакол Беларусі, дадаў ён, “няпростая абстаноўка”, якая звязана з “мілітарызацыяй” суседніх краін.

“Мы штодня нясём баявое дзяжурства. Па лічбах ужо нават сёлета ў нас зафіксавана значнае парушэнне правілаў выкарыстання паветранай прасторы і з парушэннем дзяржаўнай мяжы, у тым ліку з баявым прымяненнем. Нашыя дзяжурныя сілы ўжывалі авіяцыю, мы ўжывалі зенітныя ракетныя войскі для таго, каб знішчаць беспілотныя лятальныя апараты”, — удакладніў Лук’яновіч.

З якіх суседніх краін залятаюць БПЛА, ён не сказаў.

Ад пачатку лютага зафіксавана сама меней тры выпадкі, калі на тэрыторыю Беларусі заляталі расійскія баявыя беспілотнікі, паведаміла 11 лютага рэгіянальнае медыя “Флагшток” са спасылкай на ўкраінскія маніторынгавыя каналы “Рында маніторыць” і “еРадар”.

Апошні выпадак адбыўся раніцай 7 лютага, калі “адзін дрон вылецеў у Гомельскую вобласць праз Чарнобыль”, а пазней БПЛА “ляцеў курсам на Чарнобыль з Беларусі”. Верагодна, гэта быў адзін і той жа беспілотнік.

Уначы 6 лютага расійскі дрон рухаўся з Беларусі ў бок Оўруча (Жытомірская вобласць Украіны). Аб месцы і часе залёту дрона ў беларускую паветраную прастору не паведамлялася.

Удзень 5 лютага пара беспілотнікаў “залятала ў Беларусь, каб уздоўж мяжы накіравацца на Кіеўшчыну або Жытоміршчыну”; аб тым, што з імі было далей, невядома.

У студзені было зафіксавана восем выпадкаў, калі расійскія дроны заляталі на тэрыторыю Беларусі.

У снежні 2025 года не было ніводнага пацверджанага факта перасячэння беларускай мяжы, у лістападзе — чатыры, паведамляе выданне.

На сустрэчы са старшынёй Дзяржаўнага пагранічнага камітэта Канстанцінам Моластавым і іншымі сілавікамі 12 студзеня ў Мінску Аляксандр Лукашэнка прызнаў, што сістэма абароны прапускае чужыя беспілотнікі.

“Адзінае акно на ўсходзе з Расійскай Федэрацыяй, дзе ў нас крыху лягчэй, — сказаў ён. — Але я б не сказаў, асабліва ў сувязі з апошнімі падзеямі ва Украіне, калі невядома адкуль і незразумела адкуль могуць заляцець на тваю тэрыторыю беспілотнікі. Скажам шчыра, і мы не навучыліся яшчэ на 100% рэагаваць на гэтыя ўсе залёты і не навучыліся іх на 100% знішчаць. Не ведаю, ці магчымы гэтыя 100%. Але да гэтага трэба нам імкнуцца”.

Напрыканцы ліпеня 2025 года партал “Люстэрка” са спасылкай на відавочцаў паведаміў, што каля 2:00 дрон урэзаўся ў шматпавярховы дом у Фрунзенскім раёне сталіцы, упаў на прыпаркаваны аўтамабіль і выбухнуў. Прыкладна праз гадзіну пасля з’яўлення інфармацыі ў медыя Міністэрства абароны прызнала факт падзення беспілотніка.

Пазней Следчы камітэт паведаміў, што беспілотнік, які ўпаў, быў начынены трацілам і вялікай колькасцю паражаючых элементаў, распачата крымінальная справа. СК пацвердзіў, што абломкі беспілотніка пашкодзілі некалькі прыпаркаваных аўтамабіляў і прызямліліся на прылеглую да дома тэрыторыю.

У пачатку жніўня таго ж года рэгіянальнае выданне “Флагшток” паведаміла, што жыхароў дамоў у прыватным сектары ў Рэчыцы (Гомельская вобласць) эвакуіравалі праз беспілотнік, які ўпаў.