Памёр экс-кіраўнік Саюзу беларускіх яўрэйскіх грамадскіх аб’яднанняў і абшчын Чарніцкі

24 красавіка, Позірк. Аб смерці 24 красавіка на 81-м годзе жыцця Уладзіміра Чарніцкага, свайго старшыні з 2017 па 2021 год, паведаміў Саюз беларускіх габрэйскіх грамадскіх аб’яднанняў і абшчын (СБЯГАА).

Адзначаецца, што пад кіраўніцтвам Чарніцкага саюз “умацаваў свае пазіцыі як у Беларусі, так і на міжнародным узроўні“. У гэты перыяд “вялася актыўная праца па мемарыялізацыі памяці Халакоста і захаванні яўрэйскай спадчыны“, “рэалізаваны праекты па добраўпарадкаванні і аднаўленні яўрэйскіх могілак, усталяванні памятных знакаў на месцах масавых расстрэлаў, развіцці адукацыйных праграм і асветніцкіх ініцыятыў, накіраваных на захаванне гістарычнай памяці і ўмацаванне супольнага жыцця“.

СБЯГАА быў заснаваны ў 1991 годзе і да 2014 года ўзначальваўся вядомым архітэктарам, адным з аўтараў мемарыяльнага комплексу “Хатынь“ Леанідам Левіным (1936-2014). З 2014-га да 2017 года саюзам кіраваў тэлежурналіст, дакументаліст і пісьменнік Барыс Герстэн, з 2021 года яго ўзначальвае бізнесмен Алег Рагатнікаў.

Чарніцкі таксама займаўся бізнесам, яго сферай былі інфармацыйныя тэхналогіі.