У ЗША “вельмі добрыя стасункі” з Беларуссю, лічыць Трамп
28 лютага, Позірк. У Злучаных Штатаў Амерыкі “вельмі добрыя стасункі” з Беларуссю, заявіў прэзідэнт ЗША Дональд Трамп, размаўляючы з прэсай 27 лютага ля Белага дома перад паездкай у Тэхас.
На пытанне журналіста, ці плануе ён “аднавіць сувязі з Беларуссю — Беларуссю ў Еўропе”, “аднавіць стасункі”, амерыканскі прэзідэнт адказаў: “Мы маем добрыя стасункі”.
“І лідар — гэта чалавек, да якога я адчуваю вялікую павагу. З Беларуссю мы маем вельмі добрыя стасункі. Мне вельмі падабаецца іх лідар”, — дадаў Трамп, праігнараваўшы дадатковае пытанне, ці мае ён “нейкія ўмовы” для Мінска.
Каля года таму пачаліся адносна частыя публічныя кантакты прадстаўнікоў адміністрацыі Трампа і рэжыму Аляксандра Лукашэнкі.
12 лютага 2025 года ў выніку перагавораў у Мінску намесніка памочніка дзяржсакратара ЗША Крыстафера Сміта і прадстаўнікоў беларускіх уладаў былі вызваленыя і выпраўленыя ў Літву палітвязні Андрэй Кузнечык (супрацоўнік “Радыё Свабода”), Алена Маўшук, а таксама асуджаны ў рамках палітычна матываванай справы амерыканскі і ўкраінскі грамадзянін Мікалай Шугаеў.
21 чэрвеня ў беларускай сталіцы адбыліся перагаворы Лукашэнкі і спецпрадстаўніка прэзідэнта ЗША па пытаннях Украіны Кіта Келлага. Неўзабаве пасля гэтага на волю адпусцілі і дэ-факта выслалі з краіны 14 чалавек, пераважна палітвязняў, у тым ліку відэаблогера Сяргея Ціханоўскага — мужа Святланы Ціханоўскай.
15 жніўня адбылася тэлефонная размова паміж Трампам і Лукашэнкам. Амерыканскі кіраўнік ляцеў на Аляску сустракацца з прэзідэнтам РФ Уладзімірам Пуціным.
Трамп у сваёй сацыяльнай сетцы TruthSocial пацвердзіў факт гутаркі з “глыбокапаважаным прэзідэнтам Беларусі Аляксандрам Лукашэнкам”, назваўшы яе “выдатнай”. Паводле яго слоў, мэтай званка было выказаць Лукашэнку “падзяку за вызваленне 16 зняволеных”, маючы на ўвазе палітвязняў, але не называючы іх такімі.
“Мы таксама абмяркоўваем вызваленне яшчэ 1.300 зняволеных. Наша гутарка была вельмі плённай. Мы абмеркавалі мноства тэм, уключаючы візіт прэзідэнта [Расіі Уладзіміра] Пуціна на Аляску”, — паведаміў кіраўнік Белага дома.
17 жніўня Трамп другі раз за тры дні выказаў кампліменты на адрас Лукашэнкі. У TruthSocial ён напісаў: “Дзякуй Беларусі і яе магутнаму лідару. Я спадзяюся, што 1.300 [зняволеных] таксама хутка будуць выпушчаныя”.
52 зняволеных, у тым ліку 40 палітычных, былі вызвалены 11 верасня ў рамках здзелкі паміж адміністрацыяй Трампа і Лукашэнкам. Умовай вызвалення быў выезд вязняў з краіны (адзін з вызваленых — апазіцыйны палітык Мікалай Статкевіч — адмовіўся эміграваць у Літву, куды павезлі групу, вярнуўся на беларускую тэрыторыю і быў вернуты за краты; выйшаў на волю ў лютым 2026-га пасля перанесенага інсульту).
У дзень вызвалення гэтай групы Міністэрства фінансаў ЗША дазволіла частку аперацый з “Белавія”, а 4 лістапада стала вядома, што ведамства агулам зняло санкцыі ў дачыненні да беларускага авіяперавозчыка.
13 снежня 2025 года пасля перагавораў у Мінску спецыяльнага пасланніка прэзідэнта ЗША па Беларусі Джона Коўла і Лукашэнкі было вызвалена і вывезена з краіны 123 палітвязні. Амерыканскі дыпламат заявіў, што ЗША на ўказанне прэзідэнта Дональда Трампа здымаюць санкцыі з беларускіх калійных угнаенняў.
15 снежня Упраўленне па кантролі за фінансавымі актывамі Міністэрства фінансаў ЗША (OFAC) апублікавала агульную ліцэнзію, якая дазваляе правядзенне аперацый з ААТ “Беларуськалій” і ААТ “Беларуская калійная кампанія” (БКК).
