Праваабарончы цэнтр “Вясна” будзе працаваць у Вільнюсе і Варшаве, заяўляе яго кіраўнік Бяляцкі
21 красавіка, Позірк. Праваабарончы цэнтр “Вясна” будзе працаваць і ў літоўскай, і ў польскай сталіцы, заявіў яго кіраўнік, лаўрэат Нобелеўскай прэміі міру Алесь Бяляцкі, каментуючы ўзніклую інфармацыю пра пераезд офіса арганізацыі з Вільнюса ў Варшаву.
Паводле яго слоў, гаворка “не пра пераезд цэнтра, а пра пашырэнне геаграфічнай прысутнасці арганізацыі”.
“Пасля фактычнай эвакуацыі, выезда з Беларусі актывістаў, сябраў праваабарончага цэнтра “Вясна” ў розныя краіны, офіс арганізацыі актыўна працаваў у Вільні. Але прыйшоў час, калі мы таксама адчыняем офіс і ў Варшаве. Такім чынам, пляцоўкі “Вясны” будуць працаваць і ў Вільні, і ў Варшаве”, — цытуе Бяляцкага тэлеграм-канал цэнтра.
Раней партал “Люстэрка” пасля прымеркаванай да 30-годдзя “Вясны” ўрачыстасці, якая адбылася 21 красавіка ў варшаўскім Музеі вольнай Беларусі, на падставе слоў Бяляцкага зрабіў выснову, што “Вясна” фактычна пераехала ў Варшаву, дзе знаходзіцца большая частка каманды.
“Гэтай сустрэчай сёння мы фактычна запачаткоўваем пастаянную сістэматычную працу праваабарончага цэнтра “Вясна” ў Варшаве, у Польшчы. Пэўная частка вясноўцаў працуе таксама ў Беластоку. Мы мяркуем, што наша праца будзе, як і раней, і важная, і карысная для нашага беларускага народу. І мы вельмі ўдзячныя польскім уладам, якія стварылі ўмовы для беларускіх палітычных бежанцаў працягваць сваю працу на карысць Беларусі тут і рабіць гэта эфектыўна”, — працытаваў яго партал.
Бяляцкі, яго намеснік і віцэ-прэзідэнт Міжнароднай федэрацыі за правы чалавека (FIDH) Валянцін Стэфановіч і каардынатар кампаніі “Праваабаронцы за свабодныя выбары” Уладзімір Лабковіч былі затрыманыя беларускімі ўладамі 14 ліпеня 2021 года. 3 сакавіка 2023 года ў рамках палітычна матываванай справы аб “кантрабандзе грошай” і “фінансаванні парушэння грамадскага парадку” яны былі прыгавораныя да 10, 9 і 7 гадоў зняволення адпаведна.
Праваабаронцы разам з групамі іншых палітвязняў былі вызваленыя ў выніку перагавораў прадстаўнікоў адміністрацыі прэзідэнта ЗША з Аляксандрам Лукашэнкам. Бяляцкі і Лабковіч — 13 снежня 2025 года (першы быў вывезены ў Літву, другі — ва Украіну, адкуль пасля выехаў у Еўрасаюз), Стэфановіч — 19 сакавіка 2026-га (вывезены ў Літву).
7 кастрычніка 2022 года Нобелеўскі камітэт уганараваў прэміяй міру праваабаронцаў з Беларусі, Украіны і Расіі. Яна была прысуджаная Бяляцкаму, які на той момант знаходзіўся ў зняволенні, украінскаму Цэнтру грамадзянскіх свабод і расійскаму праваабарончаму цэнтру “Мемарыял”.
