Беларусу ў Польшчы пагражае да 15 гадоў пазбаўлення волі за кіраўніцтва групай, якая займалася кантрабандай цыгарэт
27 красавіка, Позірк. Люблінская акруговая пракуратура вядзе расследаванне ў дачыненні да арганізаванай групы, якая з траўня 2025 да красавіка 2026 года займалася кантрабандай цыгарэт з Беларусі ў Польшчу, паведаміла прэс-служба згаданага нагляднага органа.
Схема працавала ў памежных раёнах Люблінскага, Падляскага і Мазавецкага ваяводстваў.
У паведамленні гаворыцца аб перапраўцы цыгарэт праз мяжу з дапамогай 160 метэаралагічных зондаў.
Адзначаецца, што затрыманы 34-гадовы грамадзянін Беларусі Міхаіл С., якога следства лічыць арганізатарам схемы. Яму выстаўленыя “чатыры блокі” абвінавачванняў.
Першы звязаны з “кіраўніцтвам злачыннай групай”. Паводле версіі следства, беларус каардынаваў дзейнасць групы, якая займалася “сістэмнай кантрабандай падакцызных тавараў (цыгарэт)“. Максімальнае пакаранне паводле гэтага артыкула — 15 гадоў пазбаўлення волі.
Другая частка абвінавачвання тычыцца кантрабанды мінімум 240.000 пачкаў цыгарэт коштам не менш за 4,4 млн злотых (больш за 1,2 млн долараў). Падкрэсліваецца, што праз гэта польскі бюджэт недаатрымаў не менш за 6 млн злотых (больш за 1,6 млн долараў). Следства заяўляе, што кантрабанда была для абвінавачанага сталай крыніцай даходу.
Міхаіл С. абвінавачваецца таксама ў парушэнні санкцыйнага рэжыму ЕС, за што прадугледжана пакаранне ў выглядзе пазбаўлення волі на тэрмін не менш за 3 гады.
Таксама яму інкрымінуецца парушэнне адпаведных авіяцыйных правілаў.
Паведамляецца, што падазраваны “часткова прызнаў віну ва ўчыненні інкрымінаванага яму падатковага злачынства і даў тлумачэнні, змест якіх не выдаецца“.
23 красавіка 2026 года рашэннем суда мужчына арыштаваны на тры месяцы.
9 красавіка паліцыя Падляскага ваяводства паведаміла пра затрыманне грамадзян Беларусі і Польшчы за кантрабанду цыгарэт з дапамогай паветраных шароў. Тады паведамлялася, што папярэджаная страта для польскага бюджэту на 270 тыс. злотых (75 тыс. долараў). У затрыманых было канфіскавана 20 тыс. злотых (5,6 тыс. долараў) і 20 тыс. долараў.
На той момант з пачатку года агульны кошт перахопленых беларускіх цыгарэт, якія перапраўляліся па паветры толькі ў Падляскім ваяводстве, перавысіў 4,2 млн злотых (1,2 млн долараў).
