Ціханоўская ў Сусветны дзень свабоды друку: Праўда — гэта самая вялікая небяспека для рэжыму Лукашэнкі
3 траўня, Позірк. Незалежныя сродкі масавай інфармацыі з’яўляюцца “люстэркам таго, што насамрэч адбываецца ў грамадстве”, заявіла дэмакратычны лідар Святлана Ціханоўская ў Сусветны дзень свабоды друку, які адзначаецца 3 траўня.
“У Беларусі праўда стала небяспечнай, і цяпер за кожным журналісцкім матэрыялам стаіць не проста прафесійная адказнасць, але і чалавечая рызыка. Беларускія журналісты, якія сумленна робяць сваю працу, плацяць за гэта высокі кошт: арыштамі, турмамі, вымушанай эміграцыяй”, — падкрэсліла палітык.
Паводле яе слоў, беларускія СМІ “працягваюць развівацца і працаваць — у выгнанні, пад палітычным пераследам, без нармальных умоў, знаходзячы выйсце нават там, дзе, здавалася б, яго няма”.
“Сёння ўсе незалежныя СМІ працуюць з-за мяжы, але пры гэтым каля 80% іх аўдыторыі застаецца ў Беларусі”, — адзначыла Ціханоўская.
Гэта, дадала яна, падкрэслівае “не толькі прафесіяналізм журналістаў, але і вялікую патрэбу беларусаў у праўдзівай, альтэрнатыўнай інфармацыі”.
“Улада спрабуе забіць гэтую праўду — праз цэнзуру, блакіроўкі, запалохванне. Але праўда знаходзіць шлях. Шлях праз беларускую незалежную журналістыку”, — заявіла дэмлідар.
Яна падзякавала журналістам — “тым, хто ў турмах, у выгнанні і ўнутры краіны працягвае працаваць”, — адзначыўшы, што “праўда — гэта самая вялікая небяспека для рэжыму і самая вялікая каштоўнасць для людзей”.
Пасля прэзідэнцкіх выбараў 2020 года рэжым Аляксандра Лукашэнкі разграміў недзяржаўныя СМІ, вымусіўшы многія рэдакцыі пакінуць краіну і працягнуць працу за мяжой.
У Беларусі з 2020 года працягваецца пераслед прадстаўнікоў СМІ. Паводле звестак Беларускай асацыяцыі журналістаў, цяпер у няволі застаюцца 22 супрацоўнікі сродкаў масавай інфармацыі.
