“Белавія” аднавіла рэгулярныя рэйсы ў Дубай, чартарныя — у Энфіду

23 траўня, Позірк. “Белавія” аднавіла рэгулярныя рэйсы ў Аб’яднаныя Арабскія Эміраты.

Паводле інфармацыі прэс-службы авіякампаніі, самалёт “Боінг 737-8” вылецеў ранкам 22 траўня ў Дубай, а пасля вярнуўся ў Мінск.

“На пачатковым этапе рэйсы запланаваныя два разы на тыдзень: па аўторках і пятніцах. У ліпені, па меры падвышэння попыту, частата палётаў будзе павялічвацца”, — гаворыцца ў паведамленні.

Акрамя таго, адзначаецца, што “Белавія” і тураператар “Інтэрсіці” пасля пяцігадовага перапынку аднавілі чартарныя рэйсы ў Туніс — у горад Энфіда, які знаходзіцца непадалёк ад папулярных курортаў.

На пачатку траўня авіякампанія анансавала аднаўленне рэгулярных рэйсаў у Дубай, калі “будуць гарантаваныя ўмовы для бяспечнага выканання палётаў”.

Дубайскі маршрут быў часова закрыты праз баявыя дзеянні на Блізкім Усходзе, калі Ізраіль і ЗША 28 лютага распачалі ваенную аперацыю ў Іране.

Беларускі авіяперавозчык паведамляў, што ўлады Дубая адклікалі слоты і дазволы на палёты па 28 сакавіка, а пасля — па 19 красавіка.