Затрыманая ў Мінску за каментарыі іранская студэнтка дэпартаваная ў Арменію — праваабаронцы

7 чэрвеня, Позірк. Аб прымусовай высылцы з Беларусі грамадзянкі Ірана Хатэры Хадададзі паведамляе праваабарончы цэнтр “Вясна”.

Яе дэпартавалі, аднак, як адзначаецца, “не на радзіму, а ў Арменію”.

Інфармацыю пра гэта праваабаронцы атрымалі ад жанчыны, якая знаходзілася ў мінскім ізалятары разам з Хадададзі.

Паводле звестак “Вясны”, студэнтка была затрыманая ў Мінску за каментарыі пра Іран у адным з тэлеграм-каналаў.

“Ёй спачатку прызначылі 14 сутак арышту, але па сканчэнні тэрміну не вызвалілі, а пакінулі чакаць дэпартацыі. Праз тое, што Грузія адмовілася прымаць Хатэры, каб там яе не выкралі іранскія ўлады, яе ў выніку дэпартавалі ў Арменію. Вядома, што пакуль яна знаходзілася ў ІЧУ, да яе прыязджалі журналісты і здымалі пра яе сюжэт”, — паведамляюць праваабаронцы са спасылкай на згаданую жанчыну.

Чаму Хадададзі дэпартаваная ў Арменію, а не ў Іран, не ўдакладняецца.

Аб затрыманні ў Мінску студэнткі Беларускага дзяржаўнага медыцынскага ўніверсітэта Хатэры Хадададзі паведамлялася 14 траўня. Адзначалася, што затрыманне адбылося пры ўдзеле прадстаўнікоў амбасады Ірана ў Беларусі.

Сцвярджалася, што студэнтка стаматалагічнага факультэта БДМУ павінна была выйсці на волю 30 красавіка — пасля 14 сутак арышту — аднак яе пакінулі пад вартай.