На Цнянскім вадасховішчы ў Мінску памёр грамадзянін Нігерыі (дапоўнена)

дададзеныя абзацы 6–9

27 чэрвеня, Позірк. На Цнянскім вадасховішчы ў Мінску памёр грамадзянін Нігерыі 2001 года нараджэння, паведаміў 27 чэрвеня тэлеграм-канал Беларускага рэспубліканскага таварыства ратавання на водах (ТРВОД).

З інфармацыі арганізацыі вынікае, што гэта адбылося “ўчора ўначы”. Малады чалавек быў на беразе вадаёма разам з кампаніяй.

“З іх слоў, хлопец самастойна зайшоў у ваду, нырнуў і праз працяглы прамежак часу (каля 5 хвілін) не ўсплыў”, — адзначае ТРВОД. Заяўлена, што пасля самастойных пошукаў (“каля 3 хвілін”) кампанія “паведаміла пра здарэнне ў МНС”.

Работнікі МНС знайшлі замежніка за 10 метраў ад берага — у месцы, дзе глыбіня вадасховішча складае каля 2 м.

Абставіны смерці ТРВОД апісвае супярэчліва. Спачатку ў паведамленні гаворыцца, што “быў знойдзены і выцягнуты з вады загінулы малады чалавек”, а пасля, што ён “пасля правядзення рэанімацыйных мерапрыемстваў памёр”.

Акрамя таго, паводле інфармацыі арганізацыі, увечары 26 чэрвеня “ў штучным вадаёме (копані) на тэрыторыі прыватнага падворка ў аграгарадку Вязынь” (Вілейскі раён Мінскай вобласці) з вады выцягнулі цела мужчыны.

“Каля 17:00 мужчына пайшоў на рыбалку і доўга не вяртаўся. Прыкладна ў 21:10 жонка знайшла яго цела ў вадзе на адлегласці паўтара метра ад берага. Уначы работнікі ТРВОД выцягнулі загінулага на бераг”, — гаворыцца ў паведамленні.

Удзень 27 чэрвеня ў Смаргонскім раёне (Гродзенская вобласць) работнікі Астравецкай выратавальнай станцыі выцягнулі з “возера Каты” (верагодна, гаворка пра сажалку Каты побач з аднайменнай вёскай) цела мужчыны 1968 года нараджэння. Паведамляецца, што ён быў знойдзены за 7 м ад берага, дзе глыбіня складае каля 1,5 м.

“Грамадзянін прыехаў з сябрам адпачыць на вадаём з Маладзечна, месца забароненае для купання. Сябар адышоў паглядзець на рыбнае месца, пасля прыходу не знайшоў таварыша, пасля чаго паведаміў у РАУС”, — гаворыцца ў паведамленні (тэкст перакладзены на беларускую мову з захаваннем стылю арыгінала).