На патрабаванне Варшавы за мінулы тыдзень Польшчу пакінула 18 грамадзян Беларусі
29 чэрвеня, Позірк. З 22 па 28 чэрвеня больш за 200 замежнікаў пакінула Польшчу на патрабаванне ўладаў, паведамляе Памежная ахова гэтай краіны.
Польскую тэрыторыю добраахвотна пакінула 18 грамадзян Беларусі (Украіны — 41 добраахвотна і 41 прымусова, Малдовы — 17 і 2 адпаведна, Індыі — 3 прымусова).
“Сярод затрыманых замежнікаў былі, у прыватнасці, асобы, асуджаныя за неаднаразовае парушэнне забароны на кіраванне транспартнымі сродкамі, пагрозы з мэтай прымусу іншых асоб да выплаты запазычанасці, а таксама за махлярства, — гаворыцца ў паведамленні. — Некаторыя з іх былі абвінавачаныя ў сувязі з псіхалагічным і фізічным гвалтам над блізкім чалавекам, нанясеннем шкоды здароўю сярэдняй або лёгкай ступені цяжкасці, крадзяжом з узломам, а таксама выкарыстаннем падробленага або змененага дакумента ў якасці сапраўднага”.
З 15 па 21 чэрвеня тэрыторыю Польшчы на патрабаванне ўладаў пакінуў 31 беларус (добраахвотна — 26, прымусова — 5), 8–14 чэрвеня — 16 (усе — добраахвотна), 1–7 чэрвеня — 35 (добраахвотна — 33, прымусова — 2), 25–31 траўня — 16, 18–24 траўня — 22 (у абодвух выпадках — добраахвотна), 11—17 траўня — 26 (добраахвотна — 20, прымусова — 6), 4–10 траўня — 19 (14 і 5 адпаведна); 20–26 красавіка — 21 (16 і 5); 13–19 красавіка — 24 (18 і 6); 6–12 красавіка — 24 (усе — добраахвотна).
У сярэдзіне сакавіка беларуская праваабарончая ініцыятыва Dissidentby апублікавала адказ Памежнай аховы Польшчы, з якога вынікала, што за папярэднія таму моманту 2,5 месяца на патрабаванне ўладаў краіну добраахвотна ці прымусова пакінула 192 грамадзяніны Беларусі.
У 2025 годзе Памежная ахова выканала больш за 9,4 тыс. рашэнняў, якія прадпісваюць замежнікам пакінуць тэрыторыю краіны ў добраахвотным або прымусовым парадку, паведамляў раней партал onet.pl, які атрымаў адпаведныя даныя ў адказ на свой зварот у ведамства.
Грамадзян Беларусі тычылася амаль 1,3 тыс. (onet.pl апераваў прыблізнымі лічбамі), ці крыху менш за 14% усіх рашэнняў. Адзначалася, што з гэтай колькасці “каля 130” беларусаў было выслана прымусова (прыкладна 10%).
Згодна з прадстаўленымі ў матэрыяле данымі, за 2024 год (у гэтым выпадку выкарыстаныя дакладныя лічбы) з Польшчы было дэпартавана 1.377 грамадзян Беларусі, у тым ліку прымусова — 66.
