ЗША папярэдзілі Польшчу пра планы РФ зладзіць правакацыю, польская выведка не выключае ўдзелу Беларусі — СМІ
3 ліпеня, Позірк. Вашынгтон неаднаразова папярэджваў Варшаву пра планы Расіі зладзіць “узброеную правакацыю” на тэрыторыі Польшчы, паведамілі польскаму парталу Onet крыніцы, блізкія да прэзідэнта краіны Караля Наўроцкага.
Брытанскае выданне The Telegraph (як і Onet, належыць медыяхолдынгу Axel Springer і ўваходзіць у яго сетку Global Reporters Network) адзначыла, што мэта меркаванай правакацыі, якая “можа быць ажыццёўленая ўжо на працягу некалькіх месяцаў”, заключаецца ў тым, каб “узмацніць напружанасць і прымусіць заходніх саюзнікаў прыпыніць дапамогу Украіне”.
Паводле звестак гэтага СМІ, “крыніцы ў польскіх структурах бяспекі” не выключаюць і “больш традыцыйнага сцэнарыю”, у прыватнасці, “абмежаванага наземнага ўварвання расійскіх вайскоўцаў праз усходні фланг НАТО”.
“Паводле інфармацыі крыніц Onet у сферы бяспекі, сярод магчымых сцэнарыяў правакацыі — атака беспілотнікаў на аб’екты крытычнай інфраструктуры, напрыклад, электрастанцыі, альбо імітацыя паветраных удараў, якая прымусіць Польшчу задзейнічаць свае сістэмы супрацьпаветранай абароны, — гаворыцца ў матэрыяле. — Адна з крыніц у польскай выведцы заявіла, што ў найбольш крайнім сцэнарыі магчымая “гібрыдная атака ў прыгранічным раёне”. Паводле слоў той жа крыніцы, нельга выключаць узброенае ўварванне з удзелам расійскіх ці беларускіх вайскоўцаў”.
“Расія магла б выставіць гэта як выпадковае пранікненне на польскую тэрыторыю праз збой у працы GPS альбо як сумнеўную выратавальную аперацыю па эвакуацыі верталёта з няспраўнасцю. Як паведамілі Onet польскія крыніцы, Расія разлічвала б на тое, што замест адкрыцця агню па расійскіх ці беларускіх вайскоўцах Польшча пад ціскам ЗША будзе вымушаная ўступіць у перамовы з Расіяй ці Беларуссю, а не адказваць сілай”, — падкрэсліла The Telegraph.
Сцвярджаецца, што з пункту гледжання Крамля “паспяховым лічыўся б сцэнарый, пры якім расійскія сілы пакінулі б тэрыторыю Польшчы ў выніку такіх перамоў, а не з прычыны ваеннага прымусу”. Пры гэтым “адным з ключавых патрабаванняў Расіі на гэтых перагаворах у абмен на вывад войскаў з Польшчы магло б стаць спыненне заходняй падтрымкі Украіны”.
Польскі амбасадар у адной з краін НАТО пацвердзіў выданню, што “правакацыя ў адной з краін Балтыі і (або) у Польшчы з’яўляецца сур’ёзнай рызыкай”, гэта таксама пацвердзіла “крыніца ў Міністэрстве абароны Польшчы”. Яшчэ адна крыніца — “у структурах бяспекі адной з краін Балтыі” — паведаміў брытанскаму СМІ, што “падобныя планы абмяркоўваюцца ў Маскве”, у выпадку іх рэалізацыі РФ “можа паспрабаваць заявіць, што адказнасць за правакацыю нясе Украіна”.
“Любы наземны напад Расія магла б ажыццявіць або з тэрыторыі Калінінградскай вобласці — расійскага эксклава на поўнач ад Польшчы, дзе месціцца ядзерная зброя, або з тэрыторыі Беларусі, што ляжыць на ўсходзе, — гаворыцца ў матэрыяле. — Такія метады ёсць для Расіі адзіным рэалістычным спосабам арганізаваць такую правакацыю. Паколькі яе сілы задзейнічаныя ва Украіне, яна не мае магчымасцяў для вядзення поўнамаштабнай вайны супраць краін НАТО”.
“У найбольш неспрыяльным для НАТО сцэнарыі Расія імкнулася б падарваць суверэнітэт Польшчы, прадэманстраваць, што НАТО з’яўляецца “папяровым тыграм”, і дамагчыся спынення заходняй падтрымкі Украіны — пры гэтым не справакаваўшы поўнамаштабную вайну з альянсам”, — адзначыла The Telegraph.
24 лютага 2022 года РФ пачала поўнамаштабную вайну супраць Украіны — найбуйнейшы з часоў Другой сусветнай вайны канфлікт у Еўропе. Рэжым Аляксандра Лукашэнкі надаў войску РФ тэрыторыю для нападу на суседнюю краіну ўзімку і ўвесну 2022 года, а пасля на працягу многіх месяцаў з Беларусі вяліся абстрэлы ўкраінскіх гарадоў. На тэрыторыі краіны таксама лячылі расійскіх вайскоўцаў. Паводле звестак расследавальнікаў, многія беларускія прадпрыемствы зараз актыўна займаюцца вытворчасцю на карысць расійскага вайскова-прамысловага комплексу.
