За першае паўгоддзе Беларусь павялічыла экспарт бензіну ў РФ амаль у 20 разоў — СМІ

9 ліпеня, Позірк. Па выніках першага паўгоддзя 2026 года Беларусь адправіла ў Расію больш за 453 тыс. тон бензіну, што амаль у 20 разоў больш, чым за аналагічны перыяд у мінулым годзе, паведаміла ўкраінскае выданне “Апостраф” са спасылкай на інфармацыю агенцтва Reuters.

Паводле тых жа даных, экспарт беларускага дызельнага паліва ў РФ за першыя шэсць месяцаў вырас амаль у пяць разоў — да 256 тыс. тон.

Паводле звестак агенцтва, на працягу першага месяца лета беларускія НПЗ чыгуначным транспартам пераправілі ў РФ звыш 181 тыс. тон бензіну, што больш як у тры разы перавышае паказчыкі траўня.

Як адзначаў “Позірк”, расійскае выданне “Ведамасці” са спасылкай на дадзеныя Цэнтра цэнавых індэксаў РФ (ЦЦІ) раней паведамляла, што 1–25 чэрвеня Беларусь паставіла ў Расію рэкордныя 141 тыс. тон бензіну — у 2,4 разы больш, чым за ўвесь май.

Выданнем прыводзілася меркаванне эксперта па энергетыцы Кірыла Радзівонава, які заяўляў, што Беларусь здольная экспартаваць 1,8-2 млн тон бензіну ў год — гэта значыць 150–170 тыс. тон у месяц. Пры гэтым, паводле звестак крыніц агенцтва Reuters, гэтым летам спажыванне бензіну ў Расіі складае не менш як 110 тыс. тон за суткі, гэта значыць за месяц Мінск можа паставіць у краіну прыкладна 1,5-сутачны аб’ём спажывання згаданага віду паліва.

9 ліпеня намеснік старшыні канцэрна “Белнафтахім” Уладзімір Сізоў заявіў аб адсутнасці рэзкага росту попыту на беларускае аўтамабільнае паліва.

Сізоў сцвярджае, што ў Беларусі не назіраецца таксама росту колькасці спажыўцоў з Расіі, але ў прымежных з РФ раёнах “ёсць некаторае павелічэнне спажывання паліва”.

На працягу апошніх тыдняў Украіна наносіць амаль штодзённыя ўдары па расейскіх аб’ектах нафтаперапрацоўкі і захоўвання нафтапрадуктаў, што прывяло да дэфіцыту паліва ў Расіі. У многіх гарадах Расіі людзі гадзінамі стаяць у чарзе, каб заправіць машыны.

19 чэрвеня прэзідэнт Украіны Уладзімір Зяленскі заклікаў Аляксандра Лукашэнку спыніць пастаўку нафтапрадуктаў расійскай арміі. На наступны дзень у звароце да суайчыннікаў ён заявіў, што толькі за студзень — травень пастаўкі бензіну з Беларусі ў Расію выраслі ў 13 разоў у параўнанні з аналагічным перыядам мінулага года, а дызельнага паліва — у тры разы.

8 ліпеня ўрад Расіі прыняў пастанову, згодна з якой устаноўленая ў канцы студзеня і дзейная па 31 ліпеня часовая забарона на экспарт дызельнага паліва, суднавага паліва і газойляў для асоб, якія не вырабляюць паліва, была распаўсюджана і на яго вытворцаў.