13 ліпеня, Позірк. Новая група ў складзе дзевяці літоўскіх памежнікаў, сярод якіх два кінолагі са службовымі сабакамі, 15 ліпеня накіруецца ў Латвію — на мяжу з Беларуссю, паведамляе Служба аховы дзяржаўнай мяжы (САГГ) Літвы.
“Гэтая група заменіць дзевяць калег, якія цяпер працуюць у Латвіі і ахоўваюць мяжу з Беларуссю з 1 ліпеня, — гаворыцца ў паведамленні. — Плануецца, што гэтыя памежнікі, як і супрацоўнікі САДМ, якія цяпер дапамагаюць латвійцам, будуць працаваць у Латвіі два тыдні. У далейшым рашэнні пра такую дапамогу будуць прымацца з улікам сітуацыі на мяжы”.
Паводле інфармацыі ведамства, другая група накіруецца ў Латвію “на службовым транспарце, са сваёй экіпіроўкай і зброяй”. “Літоўскія памежнікі, каардынаваныя латвійскімі калегамі, на найбольш праблемных участках мяжы гэтай краіны з Беларуссю працягнуць назіранне за мяжой, прадухіленне незаконнай міграцыі з Беларусі ды іншыя дзеянні, звязаныя з аховай мяжы”, — гаворыцца ў паведамленні.
Адзначаецца, што літоўскія памежнікі аказвалі аналагічную дапамогу калегам у Латвіі ў 2023–2025 гадах.
Ад пачатку 2026 года Латвія спыніла крыху менш за 7.900 спробаў мігрантаў нелегальна перайсці мяжу з тэрыторыі Беларусі, Літва — больш за 900. Такім чынам, на латвійска-беларускім участку мяжы, што ў 3,9 раза карацейшы за літоўска-беларускі (173 супраць 679 км), прадухілена ў 8,8 раза больш такіх спробаў.
У той жа час, паводле інфармацыі САДМ, “у параўнанні з сітуацыяй мінулага года больш як у 4 разы выраслі плыні так званай другаснай міграцыі з Латвіі”. “Гэтая з’ява звязаная з нелегальнымі мігрантамі, якія з Беларусі незаконна трапілі ў Латвію, а пасля праз Літву і Польшчу спрабавалі дасягнуць Заходняй Еўропы, найчасцей — Германіі”, — звярнула ўвагу ведамства.
