Два літоўцы затрыманыя ў Польшчы — прыехалі па кантрабандныя цыгарэты, дастаўленыя з Беларусі метэазондам

15 ліпеня, Позірк. Двое грамадзян Літвы, якія падазраюцца ў датычнасці да кантрабанды цыгарэт з Беларусі, затрыманыя ў Падляскім ваяводстве, паведамляе Памежная ахова Польшчы.

Затрыманне праведзена 13 ліпеня, паведамляецца аб выяўленні 350 каробак з тытунёвымі вырабамі без польскіх акцызных марак.

Паводле звестак ведамства, тавар быў раней перапраўлены праз мяжу з выкарыстаннем метэазонда.

Адзначаецца, што гэта “чарговы выпадак“ выяўлення такога віду кантрабанды ў апошнія дні. Усяго супрацоўнікі Падляскага аддзялення памежнай службы канфіскавалі больш за 1,76 тыс. каробак з цыгарэтамі коштам каля 420 тыс. злотых (больш за 110 тыс. долараў). За які тэрмін, у рэлізе не гаворыцца.