У Літве затрыманы грамадзянін Афганістана, які ехаў у Беларусь па дзейнай візе з падробленым пашпартам

15 ліпеня, Позірк. Затрыманы грамадзянін Афганістана, які накіроўваўся ў Беларусь па дзейнай беларускай візе, паведаміла Служба аховы дзяржаўнай мяжы Літвы (САДМ).

Рашэнне аб затрыманні прынята пасля таго, як афганец прад’явіў на мяжы падроблены пашпарт.

Інцыдэнт адбыўся ўначы на 15 ліпеня ў пункце пропуску Мядзінінкай (з беларускага боку — Каменны Лог). Адзначаецца, што 31-гадовы мужчына ехаў у Беларусь рэйсавым аўтобусам з беларускай рэгістрацыяй. Падчас праверкі дакументаў у памежнікаў узніклі сумневы ў сапраўднасці прад’яўленага ім пашпарта.

Пасля дадатковай экспертызы супрацоўнікі САДМ прыйшлі да высновы, што дакумент з’яўляецца “поўнай падробкай”, гаворыцца ў паведамленні. Пры гэтым затрыманы заявіў, што легальна атрымаў пашпарт у Афганістане. Ён таксама паведаміў, што мае выдадзены Партугаліяй дазвол на часовае пражыванне, а ў Беларусь накіроўваўся “з турыстычнымі мэтамі”.

Пачата дасудовае расследаванне па факце “падробкі альбо выкарыстання падробленага дакумента”. За такое злачынства ў Літве прадугледжана пакаранне да чатырох гадоў пазбаўлення волі.