16 ліпеня, Позірк. Абмежаванні на наведванне лясоў дзейнічаюць у 103 са 118 раёнаў Беларусі, сведчаць актуальныя даныя інтэрактыўнай мапы на сайце Міністэрства лясной гаспадаркі.
Вольна наведваць лясы можна толькі ў сямі раёнах Гомельскай вобласці — Веткаўскім, Гомельскім, Добрушскім, Кармянскім, Лоеўскім, Кастрычніцкім і Чачэрскім; пяці раёнах Магілёўскай вобласці — Клімавіцкім, Касцюковіцкім, Крычаўскім, Мсціслаўскім і Хоцімскім; а таксама трох раёнах Гродзенскай вобласці — Астравецкім, Ашмянскім і Смаргонскім.
Абмежаванні азначаюць, што ў лясы нельга заязджаць на аўтамабілі і разводзіць там вогнішчы, але даступныя шпыцыры ды збор ягад і грыбоў.
Аранжавы ўзровень небяспекі ўсталяваны праз спякотнае надвор’е. Паводле звестак Белгідрамета, тэмпература паветра 16 ліпеня на паўднёвым захадзе краіны — да 30 градусаў, а 17 і 18 ліпеня — да 32 градусаў.
