Два чалавекі загінулі на пажары ў прыватным доме пад Барысавам
20 ліпеня, Позірк. Два чалавекі загінулі пры пажары ў прыватным доме ў Барысаўскім раёне (Мінская вобласць). Іх целы знайшлі ратавальнікі падчас ліквідацыі ўзгарання.
Як паведаміў Следчы камітэт, пажар адбыўся каля 4 гадзін раніцы 19 ліпеня ў вёсцы Курганаўка (12 км ад Барысава). Пасля тушэння ў доме знойдзены целы двух мужчын 62 і 51 года без прыкмет жыцця.
На месцы працавала следча-аператыўная група. Следчыя сумесна з экспертамі і супрацоўнікамі МНС правялі агляд, зафіксавалі сляды здарэння, апыталі відавочцаў і прызначылі неабходныя даследаванні.
Разглядаецца некалькі версій узнікнення пажару, у тым ліку неасцярожнае абыходжанне з агнём пры курэнні.
Канчатковыя прычыны трагедыі ўстанаўлівае Барысаўскі раённы аддзел СК.
Паводле звестак МНС, па стане на 6 раніцы 20 ліпеня, з пачатку года ў Беларусі на пажарах загінула 336 чалавек (год таму 311, рост на 8%), траўміравана 415 (320; 29,7%), выратавана 349 (238; 46,6%).
