20 ліпеня, Позірк. Пра смерць беларускай пісьменніцы Святланы Курс паведаміла 20 ліпеня Беларуская асацыяцыя журналістаў, а таксама знаёмыя аўтара ў сацыяльных сетках.
54-гадовая Курс (Ева Вежнавец) пражывала ў Варшаве. Лаўрэат прэміі імя Ежы Гедройца 2021 года за аповесць “Па што ідзеш, воўча?”
У 2025 годзе ў літаратара быў дыягнаставаны рак яечніка з метастазамі ў брушыну і лімфатычныя вузлы.
“Ужо некалькі тыдняў я адчувала, што з маім целам нешта не так: цяжар у жываце, здушванне мачавога пузыру, стомленасць. Я лячылася ад запалення — але гэта быў анкалагічны асцыт. Усе астатнія органы ў мяне здаровыя — ныркі, печань, сэрца, лёгкія — і менавіта таму ўрачы маюць спадзеў: шанец на лячэнне, на працяг жыцця”, — адзначала тады пісьменніца.
Быў абвешчаны збор у падтрымку пісьменніцы.
21 чэрвеня Курс напісала на сваёй старонцы ў “Фэйсбуку”: “Я выжыла ў вельмі цяжкім туры з пачатку красавіка. <…> Барацьба не скончаная, хвароба мая моцная і разумная”.
