Мінчанін асуджаны на 5 гадоў абмежавання волі за ахвяраванні “экстрэмісцкім” арганізацыям і захоўванне зброі

21 ліпеня, Позірк. Мінскі гарадскі суд прыгаварыў жыхара сталіцы да пяці гадоў абмежавання волі без накіравання ў папраўчую ўстанову адкрытага тыпу (ПУАТ) са штрафам у памеры 100 базавых велічынь (4,5 тыс. руб.), паведамляе Генеральная пракуратура.

Мужчына прызнаны вінаватым паводле ч. 1 арт. 361² (фінансаванне экстрэмісцкай дзейнасці) і ч. 2 арт. 295 (незаконнае абарачэнне зброі, боепрыпасаў, выбуховых рэчываў і выбуховых прылад) Крымінальнага кодэкса.

Згодна з матэрыяламі справы, у 2020 і 2022 гадах абвінавачаны перавёў 5 долараў і 10 еўра адпаведна фонду салідарнасці BySol і праекту Беларуская рада культуры (прызнаны ў Беларусі “экстрэмісцкімі фарміраваннямі”).

Адзначаецца, што пра “магчымасць ажыццяўлення пераводу грашовых сродкаў на адрас названых супрацьпраўных груп для забеспячэння іх дзейнасці” мінчанін даведаўся з сацыяльнай сеткі “Фэйсбук”.

Акрамя таго, у снежні 2024 года ён набыў праз маркетплейс рэвальвер мадэлі “Бульдог” вытворчасці завода “Курс“ (Расія) коштам больш за 3 тыс. рублёў. Гэтая зброя прызначана для стральбы “гумовымі сферычнымі снарадамі з выкарыстаннем будаўніча-мантажных патронаў калібру 5,6*16”, гаворыцца ў паведамленні. Згодна з заключэннем эксперта, рэвальвер з’яўляецца агнястрэльнай зброяй траўматычнага дзеяння.

Названую агнястрэльную зброю абвінавачаны насіў пры сабе, а таксама перавозіў і захоўваў у сваім аўтамабілі.

“Да аўтамабіля, які з’яўляецца сродкам учынення злачынства, а таксама рэвальверу мадэлі “Бульдог“, які з’яўляецца прадметам злачынства і рэччу, канфіскаванай з абарачэння, прыменена спецыяльная канфіскацыя”, — паведамляе Генпракуратура.

Прыгавор набыў моц.