Ад пачатку года ў метро Мінска зафіксавана 100 здарэнняў, 62 чалавекі траўмавана

22 ліпеня, Позірк. Ад пачатку 2026 года ў метро Мінска зарэгістравана 100 здарэнняў, 62 чалавекі атрымалі траўмы, паведамляе Генеральная пракуратура.

Здарылася сем падзенняў на пуці: тры па прычыне стану здароўя, чатыры праз парушэнні правіл карыстання метрапалітэнам і асабістую неасцярожнасць.

Найбольшая колькасць здарэнняў зафіксавана на эскалатарах, у пераходах, вестыбюлях, на платформах, пры адкрыцці і закрыцці дзвярэй цягніка, а таксама ў вагонах.

Прыводзіцца прыклад: пасажыр, які знаходзіўся на лесвічным палатне эскалатара станцыі “Маладзёжная”, абганяючы грамадзян, якія стаялі наперадзе, страціў раўнавагу і ўпаў. Мужчына траўмаваў руку.

На станцыі “Спартыўная” адзін з пасажыраў зайшоў за абмежавальную лінію на платформе, узяўся за агароджу і, нягледзячы на папярэджанне дзяжурнай па станцыі, спусціўся на II галоўны пуць і пайшоў у напрамку станцыі “Кунцаўшчына”.

На станцыі “Малінаўка” на I галоўны пуць з платформы скочыў малады чалавек за навушнікамі, якія ўпалі туды. На патрабаванне дзяжурнай па станцыі заставацца на месцы не адрэагаваў — на платформу падняўся самастойна.

Адзначаецца, што ў абодвух выпадках “дзякуючы аператыўным дзеянням работнікаў метрапалітэна, якія знялі напружанне ў 825 вольт з кантактнай рэйкі, цяжкіх наступстваў для пасажыраў-парушальнікаў не наступіла”.

Непаўналетні скочыў на II галоўны пуць на станцыі “Пралетарская”, дзе стаяў каля пуцявой сцяны станцыі да прыбыцця электрацягніка. Пасля ён быў выведзены работнікам службы бяспекі метрапалітэна праз вагон прыбыўшага саставу.

У цэлым, як заяўляецца, грамадзяне часцей за ўсё не выконвалі правілы карыстання эскалатарамі, уваходзілі ў вагоны цягніка пасля абвесткі аб закрыцці дзвярэй, актыўна выкарыстоўвалі навушнікі пры знаходжанні на платформах, стваралі сваімі дзеяннямі, станам і паводзінамі нязручнасці для іншых пасажыраў, перамяшчаліся па тэрыторыі станцый метрапалітэна і падземных пераходах на веласіпедах, ролікавых каньках і іншых падобных сродках, бегалі па прыступках лесвічных спускаў і платформах, а таксама здзяйснялі іншыя забароненыя дзеянні.

У 2025 годзе ў метрапалітэне зафіксавана 195 здарэнняў, 130 чалавек атрымалі траўмы. Мелі месца 15 падзенняў на пуць, з іх сем праз індывідуальны стан здароўя пасажыраў, пяць праз асабістую неасцярожнасць, дзве спробы суіцыду і адзін суіцыд са смяротным зыходам.

Пракуратура папярэджвае, што за праход у тунэль або знаходжанне на чыгуначных пуцях метрапалітэна паводле арт. 18.9 КаАП прадугледжана адказнасць у выглядзе штрафу ад двух да пяці базавых велічынь.

Паводле гэтага ж артыкула грамадзяне могуць быць прыцягнутыя да адміністрацыйнай адказнасці ў выглядзе штрафу ў памеры ад двух да дзесяці базавых велічынь за самавольнае спыненне пасажырам эскалатара ў метрапалітэне.