МУС апублічыла інфармацыю аб прызнанні выдавецтва “Тэхналогія” “экстрэмісцкай арганізацыяй” праз два месяцы пасля рашэння суда аб гэтым
20 жніўня, Позірк. Эканамічны суд Мінска больш за два месяцы таму (10 чэрвеня) прызнаў выдавецтва “Тэхналогія“ “экстрэмісцкай арганізацыяй“, вынікае з абноўленага 20 жніўня пераліку “арганізацый, фарміраванняў, індывідуальных прадпрымальнікаў, датычных да экстрэмісцкай дзейнасці“, на сайце Міністэрства ўнутраных спраў.
Наданне арганізацыям такога статусу рэгулюецца Законам ад 4 студзеня 2007 года № 203-З “Аб супрацьдзеянні экстрэмізму” (у рэдакцыі ад ад 17 ліпеня 2023-га).
Рашэнні выносяцца судамі.
Дзейнасць такой арганізацыі на тэрыторыі Беларусі, яе сімволіка і атрыбукіка забараняюцца. Стуктура падлягае ліквідацыі.
Стварэнне, роўна як і працяг дзейнасці, яе фінансаванне цягне за сабой крымінальную адказнасць аж да пазбаўлення волі.
Інструмент актыўна выкарыстоўваецца беларускімі ўладамі для падаўлення іншадумства і палітычных рэпрэсій (у пераліку 415 пазіцый і 377 арганізацый). У красавіку статус “экстрэмісцкай арганізацыі“ атрымаў Еўрапейскі гуманітарны ўніверсітэт у Вільнюсе).
17 і 18 лютага было затрымана мінімум 10 працаўнікоў кніжнай сферы, у тым ліку дырэктар згаданага выдавецтва Вацлаў Багдановіч, яго жонка Алена, дачкі Антаніна і Вікторыя. Багдановіча адпусцілі ў сакавіку, да гэтага праваабаронцы ўжо прызналі яго палітычным вязнем. Ягоная жонка і дачка Антаніна таксама знаходзяцца на волі. Аб вызваленні Вікторыі не паведамлялася, аднак, мяркуючы па актыўнасці пазней у сацсетках, яна таксама была адпушчана.
21 лютага выдавецтва паведаміла ў “Фэйсбуку” аб спыненні працы па “пэўных прычынах”. Падрабязнасці не прыводзіліся.
У красавіку Мінінфарм прыпыніў дзеянне ліцэнзіі “Тэхналогіі”.
У выдавецтве выпускаліся навукова-папулярныя, даведачныя, мастацкія кнігі, а таксама брашуры і іншую друкаваную прадукцыю. Акрамя кнігавыдання, кампанія займалася вырабам паліграфічнай і сувенірнай прадукцыі, а таксама гандлем медыцынскай тэхнікай.
3 сакавіка 2026 года “кааліцыя” друкаваных выдавецтваў, у якую ўваходзяць “Фонд Kamunikat.org”, Lohvinau Publishing House, Andrei Yanushkevich Publishing, унесена МУС у спіс “экстрэмісцкіх фарміраванняў”. У сувязі з ёй у пераліку згадваюцца Яраслаў Іванюк (грамадзянін Польшчы, прадстаўнік беларускай этнічнай меншасці), Дзмітрый Колас, Ігар Логвінаў, Вацлаў Багдановіч, Андрэй Янушкевіч і Аляксандр Яўдаха.
