Пасля паводкі ў Непале знікла турыстка з Беларусі, МЗС рэкамендуе “ўлічваць абстаноўку” ў рэгіёне пры паездках

28 жніўня, Позірк. Турыстка з Беларусі лічыцца сярод зніклых без вестак у выніку паводкі ў Непале, якая адбылася 26 жніўня, паведамляюць дзяржСМІ са спасылкай на беларускае пасольства ў Індыі.

Падрабязнасці “ўдакладняюцца”.

МЗС Беларусі 27 жніўня распаўсюдзіла заяву ў сувязі з тым, што “на мяжы Непала і Кітая адбыліся разбуральная паводка і сход апоўзняў, выкліканыя землетрасеннем і анамальнымі ліўнямі”.

“Масіў, які сышоў, перакрыў рэчышча ракі Бхотэ-Косі. Прыродная катастрофа пацягнула за сабой шматлікія чалавечыя ахвяры і маштабныя разбурэнні”, — адзначыла ведамства.

“Настойліва рэкамендуемы беларускім грамадзянам выконваць меры асабістай бяспекі і ўлічваць бягучую абстаноўку ў выпадку неадкладнай неабходнасці паездак у пацярпелы рэгіён і прылеглыя зоны павышанай рызыкі на тэрыторыях Непала, Індыі і Кітая”, — гаворыцца ў заяве.

Паводле даных Бі-Бі-Сі, толькі ў Непале загінула не менш за 359 чалавек, больш за 900 лічацца прапаўшымі без вестак. У Тыбеце загінула тры чалавекі, прапала без вестак — больш за 500.

Аляксандр Лукашэнка некалькімі гадзінамі раней накіраваў спачуванні прэзідэнту Непала Раму Чандры Паўдэлу “ў сувязі са шматлікімі ахвярамі ў выніку паводкі і апоўзня”, старшыні КНР Сі Цзіньпіну — “у сувязі з трагічнымі наступствамі паводкі ў Тыбецкай аўтаномнай акрузе КНР”.