Беларусь і Мальдывы падпісалі пагадненне аб узаемным скасаванні віз
Віла на Мальдывах
24 верасня, Позірк. Мінск пацвярджае зацікаўленасць у пашырэнні супрацы з Мале ў турыстычнай галіне, пра гэта было заяўлена на сустрэчы міністра замежных спраў Беларусі Максіма Рыжанкова і яго калегі з Мальдываў Іруцішам Адам, якая прайшла 23 верасня ў Нью-Ёрку на палях 81-й сесіі Генеральнай Асамблеі ААН.
Паводле інфармацыі прэс-службы беларускага знешнепалітычнага ведамства, “дасягнутая дамоўленасць пра актывізацыю супрацы ў міжнародных арганізацыях па пытаннях, якія прадстаўляюць узаемны інтарэс”.
Адзначаецца, што бакі выказалі гатоўнасць “развіваць дагаворна-прававую базу, у тым ліку ў галіне паветраных зносін”.
У ліку “перспектыўных кірункаў узаемадзеяння” вызначаныя адукацыя, падрыхтоўка кадраў для медыцыны, турызму і рэкрэацыі, а таксама пастаўкі беларускай харчовай прадукцыі.
Па выніках перамоў падпісанае міжурадавае пагадненне аб узаемным скасаванні віз.
На сустрэчы Рыжанкова з кіраўніком МЗС Ганы Сэмюэлем Акудзета Аблаквам быў адзначаны “паспяховы досвед узаемадзеяння ў сферы механізацыі сельскай гаспадаркі”, уключаючы “пастаўкі беларускага харчавання і ўгнаенняў”.
Пра пастаўкі ў Беларусь садавіны, гародніны і арэхаў з Азербайджана ішла размова на сустрэчы з міністрам замежных спраў гэтай краіны Джэйхунам Байрамавым. Па выніках гутаркі быў падпісаны план супрацы паміж ведамствамі на 2027–2028 гады, а таксама мемарандум аб узаемаразуменні і супрацы паміж міністэрствамі па консульскіх пытаннях.
Аляксандр Лукашэнка ўхваліў праект міжурадавага пагаднення з Мальдывамі аб узаемным скасаванні віз некалькі тыдняў таму. У адпаведнасці з дакументам грамадзяне Беларусі і Мальдываў змогуць “уязджаць, выязджаць і ехаць транзітам па тэрыторыі дзяржавы іншага боку без віз”. Пры гэтым працягласць бязвізавага знаходжання не мае перавышаць 30 дзён з даты ўезду і 90 дзён на працягу каляндарнага года.
На сустрэчы з ганскім прэзідэнтам Джонам Драмані Махамам 8 чэрвеня ў Мінску Лукашэнка заявіў, што Беларусь мае “даволі развіты” вайскова-тэхнічны комплекс і гатовая супрацоўнічаць з Ганай у пытанні падрыхтоўкі вайсковых кадраў.
Кіраўнік МЗС Польшчы пагаварыў у Нью-Ёрку з Рыжанковым, назваў сустрэчу "азнаямленчай"
23 верасня, Позірк. Кіраўнік МЗС Польшчы Радаслаў Сікорскі сустрэўся з міністрам замежных спраў Беларусі Максімам Рыжанковым у Нью-Ёрку на палях Генеральнай Асамблеі ААН, паведамляе партал Onet. Па выніках сустрэчы, як адзначаецца, Сікорскі параўнаў перспектывы нармалізацыі двухбаковых адносін з “пралескай, якая …
