17-гадовы п’яны бяспраўнік з Узды на машыне бацькі вёз 16-гадовага пасажыра і трапіў у ДТЗ — распачатая крымінальная справа
5 лістапада, Позірк. У дачыненні да 17-гадовага жыхара Узды (Мінская вобласць) распачатая крымінальная справа паводле ч. 4 арт. 317 КК (парушэнне ПДР і эксплуатацыі транспартнага сродку асобай, якая кіруе <…> у стане алкагольнага ап’янення, што з неасцярожнасці прывяло да прычынення цяжкага цялеснага пашкоджання), паведамляе прэс-служба Следчага камітэта.
Паводле інфармацыі ведамства, уначы 25 кастрычніка юнак, будучы п’яным і не маючы правоў кіроўцы, сеў за стырно бацькавага аўтамабіля “Опель Астра”. У салоне таксама знаходзіўся 16-гадовы пасажыр — жыхар аграгарадка Сямёнавічы (Уздзенскі раён).
На 39-м кіламетры аўтадарогі, якая вядзе з Капыля ў Лагавішча праз Бабоўню, кіроўца не даў рады кіраванню — аўтамабіль з’ехаў на ўзбочыну і ўрэзаўся ў апору лініі электраперадачы, плот, а пасля і жылы дом.
У выніку аварыі непаўналетні пасажыр атрымаў цяжкія цялесныя пашкоджанні і быў шпіталізаваны. Юны кіроўца таксама пацярпеў, але, відаць, не так сур’ёзна, бо, згодна з інфармацыяй СК, пасля інцыдэнту быў затрыманы.
Следчы разам са спецыялістамі Дзяржкамітэта судовых экспертыз і супрацоўнікамі Дзяржаўтаінспекцыі агледзеў месца здарэння і зафіксаваў дарожную абстаноўку. “Вынятыя аўтамабіль, сляды і прадметы, якія маюць значэнне для расследавання, прызначаны шэраг экспертных даследаванняў. Транспартны сродак змешчаны на ахоўную стаянку”, — гаворыцца ў паведамленні.
Па факце аварыі з трыма загінулымі падлеткамі ў Лельчыцкім раёне распачатая крымінальная справа
31 кастрычніка, Позірк. Па факце смяротнай аўтамабільнай аварыі, якая здарылася 31 кастрычніка ў Лельчыцкім раёне (Гомельская вобласць), распачатая крымінальная справа паводле ч. 3 арт. 317 КК (парушэнне правілаў дарожнага руху або эксплуатацыі транспартных сродкаў, якое з неасцярожнасці прывяло да смерці …
