Рыжанкоў абмеркаваў з кіраўніком МЗС Непала прыцягненне з гэтай краіны ў Беларусь працоўных мігрантаў
27 верасня, Позірк. Аб сустрэчы міністра замежных спраў Максіма Рыжанкова з калегам з Непала Шышырам Ханалам паведамляе Беларускае знешнепалітычнае ведамства.
Сустрэча прайшла на палях 81-й сесіі Генеральнай Асамблеі ААН у Нью-Ёрку.
Падчас перамоваў, як заяўляецца, бакі “надалі асаблівую ўвагу стварэнню дзейснага механізму арганізаванага прыцягнення грамадзян Непала для працаўладкавання ў Беларусі, які прадугледжвае абарону іх працоўных і сацыяльных правоў, а таксама забеспячэнне бяспекі”.
“Суразмоўцы дасягнулі дамоўленасці аб правядзенні міжведамасных кансультацый па гэтым пытанні пры каардынацыі міністэрстваў замежных спраў дзвюх краін”, — адзначае МЗС.
Таксама міністры “пагадзіліся з неабходнасцю пошуку новых пунктаў росту гандлёва-эканамічнага супрацоўніцтва з улікам узаемадапаўняльнасці тавараў, якія вырабляюцца ў дзвюх краінах”, гаворыцца ў паведамленні.
Акрамя таго, бакі “дамовіліся актывізаваць узаемадзеянне ў турыстычнай сферы”.
Паведамляецца аб падпісанні міжурадавага пагаднення аб “адмене візавых патрабаванняў для ўладальнікаў дыпламатычных, афіцыйных і службовых пашпартоў”.
МЗС таксама паведаміла аб сустрэчы Рыжанкова са старшынёй 81-й сесіі Генеральнай Асамблеі ААН, міністрам замежных спраў Бангладэш Халілурам Рахманам.
Сярод іншага, як адзначаецца, суразмоўцы “абмеркавалі сітуацыю ў рэгіёне, адзначыўшы безальтэрнатыўнасць урэгулявання канфлікту ва Украіне шляхам дыялогу”.
У рэлізе таксама гаворыцца, што Рыжанкоў у Нью-Ёрку “правёў кароткія гутаркі з міністрамі замежных спраў Алжыра і Індыі”, на якіх абмяркоўваліся “ход рэалізацыі дамоўленасцяў, дасягнутых па выніках візітаў на вышэйшым і высокім узроўнях”.
Беларуская эканоміка ў апошнія гады адчувае востры дэфіцыт рабочых рук. Гэта звязана прынамсі з дзвюма прычынамі — масавым ад’ездам грамадзян з краіны пасля падзей 2020 года і дэмаграфічным крызісам.
У спробах выправіць сітуацыю ўлады дамаўляюцца аб прыцягненні ў Беларусь працоўных мігрантаў. Адкрыта адпаведныя намаганні робяцца ў дачыненні да грамадзян Пакістана і Узбекістана, аднак працоўная міграцыя з гэтых дзяржаў масавай не стала.
Колькасць вакансій для замежных работнікаў перавысіла ў Беларусі 16 тыс.
27 верасня, Позірк. 16.264 вакансіі адкрытыя на 27 верасня 2026 года для замежных грамадзян на партале Дзяржаўнай службы занятасці. Раней “Позірк” паведамляў, што 20 верасня такіх вакансій на сайце дзяржслужбы было 15.981. Такім чынам, за тыдзень іх колькасць павялічылася на …
