Прадстаўнік Беларусі ўдзельнічае ў інспекцыі, якая праводзіцца ў Сербіі ў межах Дэйтанскага пагаднення

15 кастрычніка, Позірк. Прадстаўнік Беларусі ўдзельнічае ў суправаджэнні інспекцыйнай групы Босніі і Герцагавіны ў Сербіі ў якасці запрошанага назіральніка АБСЕ, мерапрыемства праходзіць 13–16 кастрычніка. Пра гэта 14 кастрычніка паведаміў у сацыяльнай сетцы X начальнік дэпартамента міжнароднага ваеннага супрацоўніцтва Міністэрства абароны Беларусі Валерый Равенка.

Паводле яго слоў, Беларусь удзельнічае ў інспекцыі “дзякуючы нязменнай падтрымцы сербскага боку”.

Інспекцыя праводзіцца ў межах Дэйтанскага пагаднення, якое завяршыла вайну ў Босніі і Герцагавіне ў 1995 годзе. Пагадненне прадугледжвае, у прыватнасці, кантроль над узбраеннямі ў рэгіёне.

Інспектары наведваюць ваенныя аб’екты, аглядаюць і падлічваюць віды ўзбраенняў, на якія распаўсюджваецца пагадненне, у тым ліку танкі, артылерыйскія сістэмы і бранятэхніку, і супастаўляюць вынікі з данымі, прадстаўленымі бокам, які правяраецца.

Мерапрыемствы накіраваныя на забеспячэнне празрыстасці ў ваеннай сферы і ўмацаванне даверу паміж дзяржавамі рэгіёна.

У механізме субрэгіянальнага кантролю ўдзельнічаюць Боснія і Герцагавіна, Сербія, Харватыя і Чарнагорыя. Праверкі дазваляюць супастаўляць звесткі пра ўзбраенні, якія прадстаўляюцца дзяржавамі, з фактычнай наяўнасцю ваеннай тэхнікі.

Дэйтанскае пагадненне было парафіравана 21 лістапада 1995 года на авіябазе Райт-Патэрсан у амерыканскім горадзе Дэйтан і падпісанае 14 снежня ў Парыжы. Яно завяршыла вайну ў Босніі і Герцагавіне — найбуйнейшы з узброеных канфліктаў, якія суправаджалі распад Югаславіі.

Яго падпісалі прадстаўнікі Босніі і Герцагавіны, Харватыі і Саюзнай Рэспублікі Югаславіі: прэзідэнт Босніі і Герцагавіны Алія Ізетбегавіч, прэзідэнт Харватыі Франьё Туджман і прэзідэнт Югаславіі Слабадан Мілошавіч.

Мілошавіч прадстаўляў таксама інтарэсы баснійскіх сербаў у адпаведнасці з раней дасягнутымі дамоўленасцямі. Падпісанне праходзіла пры пасрэдніцтве ЗША і з удзелам міжнародных сведак.

Пры гэтым у сакавіку 2025 года Аляксандр Лукашэнка заяўляў, што “папярэджваў былога прэзідэнта Югаславіі Слабадана Мілошавіча пра недахопы Дэйтанскага пагаднення, заключанага паводле ўказкі Захаду”. Тады палітык сцвярджаў, што “прадбачыў праблемы, якія пагадненне прынясе рэгіёну”.