СК: Асноўная версія гібелі чалавека на пажары ў мінскім інтэрнаце — неасцярожнае курэнне

16 кастрычніка, Позірк. Следчы камітэт паведаміў аб праверцы ў сувязі з гібеллю 36-гадовага мужчыны на пажары ў інтэрнаце на праспекце Пушкіна ў Мінску.

Ведамства канстатуе, што пры ліквідацыі пажару супрацоўнікі МНС знайшлі ў памяшканні цела загінулага і яго 44-гадовую сужыцельку без прытомнасці.

Дзякуючы праведзеным рэанімацыйным мерапрыемствам жанчыну ўдалося выратаваць, яна шпіталізаваная ў цяжкім стане, гаворыцца ў паведамленні.

СК адзначыў, што на месцы здарэння працавала следча-аператыўная група, прызначаны комплекс экспертыз.

Паведамляецца, што цяпер разглядаецца некалькі версій узнікнення пажару, асноўная — неасцярожнае абыходжанне з агнём пры курэнні.

Раней прэс-служба Міністэрства па надзвычайных сітуацыях апублікавала кадры тушэння, якія дазваляюць выказаць здагадку, што пажар быў у інтэрнаце №1 УП “Мінскаблсельбуд” (пр. Пушкіна, 20).

Паводле інфармацыі ведамства, да моманту прыезду пажарных з акна на 6-м паверсе “назіраўся моцны дым”.

“Падчас выведкі ў падпаленым пакоі без прытомнасці выяўленыя двое пацярпелых: мужчына і жанчына, — гаварылася ў паведамленні. — Іх вынеслі з небяспечнай зоны і перадалі медыкам. Пасля рэанімацыйных мерапрыемстваў пацярпелая жанчына прыйшла ў прытомнасць. Яе шпіталізавалі. Медыкі канстатавалі смерць мужчыны”.

Адзначалася, што з-за моцнага задымлення паўстала пагроза для жыхароў сумежных кватэр і кватэр на верхніх паверхах: “Работнікі МНС выратавалі 11 чалавек, з іх 5 дзяцей. Усе яны не пацярпелі. Таксама ратавальнікі эвакуявалі яшчэ 40 чалавек”.

Задымленыя памяшканні правентылявалі спецыяльным абсталяваннем. На месцы здарэння працавала 12 адзінак тэхнікі.