Загадчыца парку атракцыёнаў у Магілёве прысуджаная да 2,5 года калоніі-пасялення па справе аб гібелі 18-гадовага стажора
16 кастрычніка, Позірк. Суд Кастрычніцкага раёна Магілёва прыгаварыў да 2,5 года пазбаўлення волі ў папраўчай калоніі ва ўмовах пасялення 25-гадовую загадчыцу паркам атракцыёнаў, паведамляе Генеральная пракуратура.
Жанчына прызнаная вінаватай паводле ч. 2 арт. 306 КК (парушэнне правілаў тэхнікі бяспекі і іншых правілаў аховы працы службовай асобай, адказнай за іх выкананне, што пацягнула па неасцярожнасці смерць чалавека).
Ёй таксама забаронена на працягу пяці гадоў займаць пасады, звязаныя з выкананнем арганізацыйна-распарадчых абавязкаў.
Акрамя таго, з юрыдычнай асобы — уласніка атракцыёну — на карысць маці загінулага спагнана 150 тыс. рублёў у кошт кампенсацыі маральнай шкоды.
Як устаноўлена ў судзе, 1 траўня 2026 года 18-гадовы навучэнец другога курса каледжа працаваў на атракцыёне “Сальта” ў Магілёве. Загадчыца парку дапусціла яго да працы без заключэння працоўнага або грамадзянска-прававога дагавора. “Малады чалавек не праходзіў медыцынскі агляд, навучанне, стажыроўку, першасны інструктаж і праверку ведаў у пытаннях прамысловай бяспекі і аховы працы”, — адзначае Генпракуратура.
Пасля завяршэння працоўнага цыклу ён не ўстанавіў балансір з каруселлю на фіксатар. Пасля высадкі пасажыраў балансір самаадвольна прыйшоў у рух, і рухомая частка атракцыёну ўдарыла маладога чалавека па галаве. Ён памёр на месцы здарэння.
Паведамляецца, што абвінавачаная ў судзе прызнала віну і раскаялася.
Прысуд не ўступіў у законную сілу і можа быць абскарджаны.
Аб устанаўленні абставінаў гібелі стажора Следчы камітэт паведамляў 16 верасня, тады ж стала вядома аб прад’яўленым абвінавачванні загадчыцы парку атракцыёнаў.
Аб узбуджэнні крымінальнай справы па факце гібелі 18-гадовага стажора на атракцыёне ў Магілёве СК паведаміў 3 траўня.
Тады адзначалася, што расследаванне праводзіцца ў дачыненні да 56-гадовага дырэктара арганізацыі адпачынку і забаў, яму была інкрымінаваная ч. 2 арт. 428 КК (службовая халатнасць, якая пацягнула па неасцярожнасці смерць чалавека).
Пра гібель стажора СК паведаміў 1 траўня.
