За дзевяць месяцаў ВУП вырас на 2% — Белстат (падрабязна)

16 кастрычніка, Позірк. Валавы ўнутраны прадукт Беларусі ў студзені — верасні 2026 года павялічыўся на 2% у параўнанні з тым жа леташнім перыядам, паведамляе Нацыянальны статыстычны камітэт пасля першай ацэнкі паказчыка.

У бягучых цэнах ВУП склаў 237 млрд рублёў.

У студзені эканоміка скарацілася на 1,2% да студзеня 2025-га (23,3 млрд рублёў), у студзені — лютым — на 1,2% да таго ж перыяду мінулага года (43,9 млрд), студзені — сакавіку — на 0,4% (68,2 млрд), студзені — красавіку — вырасла на 0,2% (94,5 млрд), студзені — траўні — на 0,9% (118,6 млрд), студзені — чэрвені — на 1,5% (149,6 млрд), студзені — ліпені — на 2,1% (180,5 млрд), студзені — жніўні — на 1,9% (209,1 млрд).

Індэкс-дэфлятар ВУП за дзевяць месяцаў у гадавым выражэнні павялічыўся на 11,7%. Гэты індыкатар вымярае сярэдняе змяненне цэн на ўсе тавары і паслугі, вырабленыя ў краіне за год. Ён роўны адносінам намінальнага ВУП у бягучых цэнах да рэальнага ВУП у базісных цэнах. Паказчык дапамагае зразумець узровень інфляцыі для ўсёй эканомікі.

Прэм’ер-міністр Аляксандр Турчын 2 верасня пасля дакладу Аляксандру Лукашэнку заявіў, што ва ўрада “пэўны аптымізм у эканоміцы ёсць”. “І рост ВУП за сем месяцаў, і мы бачым тэндэнцыі да канца бягучага года. Фактычна ўсе галіны эканомікі выйшлі ў пазітыўную і станоўчую дынаміку. Але сітуацыя абсалютна неадназначная і ў разрэзе галін, і ў разрэзе асобных суб’ектаў гаспадарання”, — сцвярджаў чыноўнік.

Раней паведамлялася, што спажывецкія цэны ў верасні 2026 года выраслі на 0,5%. Харчовыя тавары за месяц падаражэлі на 0,1%, нехарчовыя — на 0,6%, паслугі — на 0,9%.

У параўнанні са снежнем 2025-га рост цэн склаў 3,6%. Харчовыя тавары сталі даражэйшымі на 0,8%, нехарчовыя — на 3,4%, паслугі — на 8,6%.

У гадавым вымярэнні (да верасня 2025-га) цэны сталі вышэйшымі на 4,6%: на харчовыя тавары — на 2,8%, нехарчовыя — на 3,7%, паслугі — на 9%.

Паводле найважнейшых эканамічных прагнозных (дэ-факта планавых) параметраў на 2026 год, валавы ўнутраны прадукт павінен павялічыцца на 2,8%.

У кастрычніку Міжнародны валютны фонд спрагназаваў у сваім аглядзе рост беларускай эканомікі ў 2026-м на 1,9%, 2027-м — на 1,2%.

Еўрапейскі банк рэканструкцыі і развіцця ў верасні мінулага года пагоршыў свой прагноз на 2026-ы з 2,5% да 2,3%.

Еўразійскі банк развіцця чакае росту эканомікі Беларусі ў 2026 годзе на ўзроўні 1,5%.

У восеньскім дакладзе Еўразійскага фонду стабілізацыі і развіцця прырост ВУП краіны па выніках бягучага года “чакаецца на ўзроўні каля 2%”.

Паводле звестак Белстата, аб’ём ВУП у 2025 годзе вырас на 1,3% (286,7 млрд рублёў) пры плане 4,1%. У студзені ён павялічыўся на 3,7% (20,5 млрд), студзені — лютым — на 3,1% (38,7 млрд), студзені — сакавіку — на 3,1% (59,4 млрд), студзені — красавіку — на 2,8% (81,4 млрд), студзені — траўні — на 2,5% (101,4 млрд), студзені — чэрвені — на 2,1% (129 млрд), студзені — ліпені — на 1,3% (155,2 млрд), студзені — жніўні — на 1,6% (180,1 млрд), студзені — верасні — на 1,6% (206,8 млрд), студзені — кастрычніку — на 1,5% (234,6 млрд), студзені — лістападзе — на 1,3% (258 млрд).

Па выніках 2024 года рост эканомікі склаўся на ўзроўні 4%, 2023-га — 3,9%. У 2022-м ВУП знізіўся на 4,7%, 2021-м — вырас на 2,3%, 2020-м — скараціўся на 0,9%.