МАРГ спыніў рэкламу падсанкцыйнай касметыкі Nivea на партале Onliner
21 кастрычніка, Позірк. Міністэрства антыманапольнага рэгулявання і гандлю (МАРГ) вынесла прадпісанне ТАА “Онлайнер” праз рэкламу касметыкі, забароненай да ўвозу і продажу ў Беларусі, паведаміла 21 кастрычніка прэс-служба ведамства.
Адзначаецца, што рэклама, у тым ліку прадукцыі гандлёвай маркі Nivea, размяшчалася ў мабільнай версіі інфармацыйнага рэсурсу Onliner у канцы артыкулаў у раздзелах “Аўто” і “Тэхналогіі”.
Парушэнне было выяўлена пры разглядзе “звароту грамадзяніна”, гаворыцца ў паведамленні. МАРГ заяўляе, што ТАА “Онлайнер” парушыла закон “Аб рэкламе”. Прадпісанне аб ліквідацыі парушэння выканана.
Рэкламадаўцам выступала ТАА “Яндэкс Рэклама”. Паведамляецца, што МАРГ накіраваў кампаніі папярэджанне аб “недапушчальнасці парушэння заканадаўства” і “неабходнасці прыняць меры для прадухілення падобных выпадкаў у далейшым”.
Ведамства нагадала, што рэкламараспаўсюджвальнік можа быць выключаны з рэестра рэкламараспаўсюджвальнікаў, калі не ліквідуе парушэнне альбо на працягу года атрымае два і больш прадпісанні аб ліквідацыі парушэнняў.
Беларусь увяла забарону на ўвоз і продаж прадукцыі Nivea ў красавіку 2021 года на фоне адмовы кампаніі Beiersdorf, якой належыць брэнд, спансіраваць чэмпіянат свету па хакеі ў Беларусі ў тым жа годзе. Адмова была выкліканая ўнутрыпалітычнай сітуацыяй у краіне. Чэмпіянат у студзені таго ж года быў перанесены ў Латвію (прайшоў з 21 траўня па 6 чэрвеня), якая першапачаткова павінна была прымаць яго разам з Беларуссю.
У снежні 2025 года забарона была падоўжаная да 31 снежня 2027 года. Па тых жа прычынах яна тычыцца таксама гандлю таварамі груп кампаній Liqui Moly і Škoda Auto.
