На думку генпракурора, дзякуючы Кастрычніцкай рэвалюцыі беларусы “стварылі інтэлектуальны патэнцыял і ўзбагацілі культурную спадчыну”
7 кастрычніка, Позірк. Падзеі кастрычніка 1917 года “змянілі ход гісторыі і спрыялі станаўленню нацыянальнага самавызначэння беларусаў”, такое меркаванне выказаў генеральны пракурор Дзмітрый Гара ў віншаванні з Днём Кастрычніцкай рэвалюцыі (7 лістапада адзначаецца 109-я гадавіна).
“Дзякуючы Кастрычніцкай рэвалюцыі мы здабылі дзяржаўнасць, стварылі эканамічны і інтэлектуальны патэнцыял, узбагацілі культурную спадчыну, — лічыць ён. — Наша краіна захавала не толькі гістарычную памяць, але і працоўныя дасягненні папярэдніх пакаленняў. Сёння яднанне і стваральная праца з’яўляюцца найважнейшымі фактарамі кансалідацыі грамадства і паступальнага развіцця дзяржавы”.
У сваю чаргу Аляксандр Лукашэнка ў віншаванні з гэтай жа нагоды заявіў, што 7 лістапада адбыліся “лёсавызначальныя падзеі, якія вярнулі мільёнам людзей веру ў роўнасць, справядлівасць і годнае жыццё”. “Абвешчанае савецкай уладай права нацый на самавызначэнне стала асновай, на якой мы пабудавалі сваю краіну і ўпершыню выйшлі на сусветную арэну як суверэнная дзяржава”, — лічыць ён.
Варта адзначыць, што Гара, кажучы пра стварэнне інтэлектуальнага патэнцыялу і ўзбагачэнне культурнай спадчыны, не згадаў пра масавыя рэпрэсіі, якія бальшавікі разгарнулі ў дачыненні да самых розных слаёў насельніцтва. Цяжкі ўдар быў нанесены па нацыянальнай інтэлігенцыі — дзеячах культуры, навукоўцах, выкладчыках, пісьменніках і дзяржаўных службоўцах. Многіх з іх савецкая ўлада абвінавачвала ў нацыяналізме і антысавецкай дзейнасці, нярэдка на падставе сфабрыкаваных абвінавачанняў.
За адну толькі ноч на 30 кастрычніка 1937 года, праз 20 гадоў пасля Кастрычніцкай рэвалюцыі, у Мінску было расстраляна больш за 100 чалавек, у тым ліку 22 літаратары — паэты, празаікі, перакладчыкі, крытыкі.
Як дзяржаўнае свята гадавіна Кастрычніцкай рэвалюцыі адзначаецца толькі ў Беларусі і самаабвешчанай Прыднястроўскай Малдаўскай Рэспубліцы.
Чорная ноч беларускай літаратуры. Як захавалася памяць аб расстраляных паэтах
У ноч на 30 кастрычніка 1937 года ў Мінску былі расстраляныя прадстаўнікі беларускай інтэлектуальнай эліты, у тым ліку 22 літаратары. На працягу дзесяцігоддзяў памяць пра іх вярталася ў грамадскую прастору праз навуковыя даследаванні, пошукі страчаных твораў, літаратурныя чытанні і акцыі …
