Лукашэнка лічыць санкцыі “самым галоўным рэзервам” для павелічэння тавараабароту з Ніжагародскай вобласцю РФ

19 траўня, BPN. Санкцыйнай палітыкай краіны Захаду падштурхнулі Беларусь і Расію да больш інтэнсіўнага развіцця, заявіў Аляксандр Лукашэнка 19 траўня ў Мінску на сустрэчы з губернатарам Ніжагародскай вобласці РФ Глебам Нікіціным.

Паводле яго слоў, тавараабарот Беларусі і гэтага расійскага рэгіёну ў бліжэйшы час дасягне мільярда долараў. “Гэта вельмі вялікі ўзровень, — цытуе Лукашэнку яго прэс-служба. — І трэба сказаць, што мы пастаянна прыбаўляем. Я думаю, што мы з вамі дасягнем гэтага ўзроўню. Тым больш у нас ёсць імкненне да нарошчвання тавараабароту, у нас ёсць і вялікія рэзервы. Самы галоўны рэзерв, як ні дзіўна, — гэта санкцыі”.

Ад больш шчыльнага беларуска-расійскага супрацоўніцтва, упэўнены ён, “будзе эфект, але не імгненны”, на гэта патрэбны час, бо “разгарнуць такую махіну не так проста, галін шмат”. “Прамысловасць, сельская гаспадарка, іншыя сферы — вялізныя”, — канстатаваў Лукашэнка.

Ён адзначыў, што сярод 145 краін, з якімі супрацоўнічае Ніжагародская вобласць, Беларусь “знаходзіцца на першым месцы”.