МАЗ заняў 8-е месца па продажах новых грузавікоў на рынку РФ у ліпені

15 жніўня, Позірк. У ліпені 2023 года на расійскім рынку прададзена 489 новых грузавікоў Мінскага аўтамабільнага завода — на 53,8% больш, чым у тым жа месяцы 2022-га (318), сведчаць даныя аналітычнай кампаніі “Аўтасельгасмаш-холдынг” (РФ).

Прадукцыя мінскага прадпрыемства ў мінулым месяцы заняла 8-е месца ў спісе самых прадаваных брэндаў гэтага сегмента аўтарынку Расіі (годам раней — 5-е), канстатуюць эксперты.

У пяцёрцы лідараў знаходзяцца расійскі КамАЗ, кітайскія SITRAK, Shacman, FAW, HOWO.

За сем месяцаў МАЗ рэалізаваў 3.533 новыя грузавікі — на 50,2% больш, чым за аналагічны перыяд 2022-га (2.352).

20 ліпеня 2022 года пасол РФ Барыс Грызлоў на сустрэчы з кіраўніком холдынгу “Белаўтамаз” Валерыем Іванковічам заявіў, што прадукцыя Мінскага аўтазавода “карыстаецца вялікім попытам” у Расіі.

Паводле слоў Іванковіча, расійскі рынак “гістарычна з’яўляецца асноўным для беларускага прадпрыемства: у Расіі рэалізуецца каля 60-70 працэнтаў аб’ёмаў выпускаемай тэхнікі”.

15 чэрвеня падчас Пецярбургскага міжнароднага эканамічнага форуму першы віцэ-прэм’ер Беларусі Мікалай Снапкоў заявіў, што рынак аўтатэхнікі Саюзнай дзяржавы “мае патрэбу ў аператыўным прыняцці спецыяльных ахоўных мер праз актыўную экспансію кітайскіх вытворцаў”.

“Гаворка не проста пра падвышэнне імпартных пошлін, тут поля для манеўру амаль няма. Я маю на ўвазе антыдэмпінгавыя і спецахоўныя меры”, — сказаў Снапкоў.

Паводле яго слоў, экспансія ўсходніх партнёраў на беларускім і расійскім рынках аўтамабільнай грузавой тэхнікі “відавочная”, а дынаміка іх продажаў “запалохвальная”.