КДК узбудзіў першую крымінальную справу за павышэнне коштаў

9 кастрычніка, BPN. Першую крымінальную справу за павышэнне коштаў — у Магілёўскай вобласці — узбудзіў Камітэт дзяржкантролю.

“Па матэрыялах КДК устаноўлены факты перапродажу прыватнымі прадпрыемствамі айчыннай сельгаспрадукцыі арганізацыям бюджэтных сфер па завышаных цэнах. У дачыненні да дырэктара гэтага прадпрыемства сёння, 8 кастрычніка, узбуджана крымінальная справа па ч. 2 арт. 426 КК Рэспублікі Беларусь — перавышэнне ўлады або службовых паўнамоцтваў”, — паведаміла ў эфіры тэлеканала “Беларусь 1” загадчыца сектара кантролю за цэнамі на спажывецкія тавары КДК Таццяна Самохіна.

Паводле яе даных, дзяржаве нанесена шкода ў буйным памеры — больш за 10 тыс. рублёў.

Намеснік начальніка аддзела Дэпартамента фінансавых расследаванняў КДК Юрый Кардымон заявіў аб фактах завышэння цэн у Лідзе (Гродзенская вобласць).

“Камітэтам дзяржкантролю былі ўстаноўлены факты завышэння цэн у адной з магазінаў горада Ліды ў параўнанні з цэнамі, якія былі па стану на 6 кастрычніка бягучага года”, — сказаў Кардымон у эфіры тэлеканала АНТ.

Паводле яго слоў, у продажы знаходзіліся чатыры віды каўбасных вырабаў, на якія была неабгрунтавана завышана цана: розніца даходзіла да 2 рублёў у параўнанні з цаной на пачатку гэтага тыдня.

“Як было ўстаноўлена падчас праверачных мерапрыемстваў, была не проста пераклейка цэннікаў, а была і фактычная рэалізацыя грамадзянам гэтых каўбасных вырабаў па завышаных цэнах”, — дапоўніў Кардымон інфармацыю ў эфіры “Беларусь-1”.

Па сітуацыі ў Лідзе праводзіцца праверка, крымінальная справа пакуль не ўзбуджалася.

6 кастрычніка Аляксандр Лукашэнка па выніках нарады аб цэнавай сітуацыі ў краіне падпісаў дырэктыву № 10 “Аб недапушчальнасці росту цэн”. Свае дакументы прынялі ўрад, Камітэт дзяржкантролю, Генпракуратура. Тыя, хто павысіць кошты без санкцыі міністра антыманапольнага рэгулявання і гандлю або старшыні аблвыканкама (Мінгарвыканкама), будуць несці адказнасць аж да крымінальнай, заявіў на нарадзе Лукашэнка.