Музыкі гурта Krumkač выйшлі на волю пасля адміністрацыйнага арышту

16 красавіка, BPN. Удзельнікі гурта Krumkač Арцём Раманаў і Аляксандр Кубышкін выйшлі на волю пасля адміністрацыйнага арышту, паведаміў
на сваёй старонцы ў “Фэйсбуку” гомельскі валанцёр Ілля Міронаў.

Музыкі былі арыштаваныя на 10 сутак за “распаўсюд экстрэмісцкіх матэрыялаў” (арт. 19.11 КаАП). Яны адбывалі пакаранне ў гомельскім ізалятары часовага ўтрымання.

Пра затрыманне Раманава стала вядома 6 красавіка.

Паводле інфармацыі Беларускага ПЭНа, на 31 сакавіка ў Беларусі 137 дзеячаў культуры знаходзілася ў няволі.

У маніторынгу ПЭНа аб парушэннях правоў чалавека ў сферы культуры падкрэсліваліся асобныя факты палітычнага крымінальнага пераследу: закрыты суд над Паўлам Белавусам, прысуды даследчыкам Валерыі Касцюговай і Таццяне Кузінай (10 гадоў пазбаўлення волі), сям’і музыкаў гурта Litesound Каракіных (ад 2,5 да 3 гадоў абмежавання волі без накіравання ў папраўчую ўстанову адкрытага тыпу) і інш.

Аўтары даследавання канстатавалі, што ў другой палове сакавіка працягваліся палітычна матываваныя адміністрацыйныя затрыманні і арышты дзеячаў культуры, аўтараў і выканаўцаў. З 29 па 31 сакавіка ў Полацку (Віцебская вобласць) прайшлі ператрусы і затрыманні (11 чалавек) супрацоўнікаў мясцовага гісторыка-культурнага музея-запаведніка.

Акрамя таго, у гэты перыяд фіксаваліся факты арыштаў і судоў за беларускую і ўкраінскую нацыянальную сімволіку, працягваліся рэпрэсіі ў кніжнай сферы.

Раней Беларускі ПЭН паведамляў, што ў 2022 годзе зафіксавана не менш за 1.390 парушэнняў культурных правоў і правоў чалавека ў дачыненні да дзеячаў культуры. На канец мінулага года ў краіне налічвалася 108 дзеячаў культуры, прызнаных палітвязнямі.