18 лістапада, Позірк. Семінар для беларусаў Варшавы “Бяспечная Беларусь. Формы і метады абароны грамадства”, хутчэй за ўсё, выявіўся аперацыяй КДБ.
Мерапрыемства ў польскай сталіцы 18 лістапада арганізаваў былы магілёўскі каардынатар аргкамітэта па стварэнні партыі Беларуская хрысціянская дэмакратыя, былы дырэктар інфармацыйна-асветніцкай установы “Ноктуам” Алег Аксёнаў па прапанове мужчыны, які выйшаў на яго, назваўшы сябе прадстаўніком Еўрасаюза па бяспецы з Нідэрландаў.
На семінары, дзе прысутнічаў вядомы дзеяч апазіцыі Вячаслаў Сіўчык, “галандзец”, які ўдзельнічаў анлайн, перадаў слова невядомаму, пазіцыянаваўшы яго як “арганізатара і фундатара нашага семінара па бяспецы”. Невядомы, пажадаўшы добрага вечара “ўсім прысутным”, заявіў: “Перш за ўсё ад імя Камітэта дзяржаўнай бяспекі я хацеў бы падзякаваць грамадзяніну Аксёнаву за працяглае і плённае супрацоўніцтва з намі. Што ж тычыцца іншых удзельнікаў семінара, звяртаю вашу ўвагу, што спробы замахнуцца на беларускую дзяржаўнасць у цывілізаваных краінах называюцца экстрэмізмам і кваліфікуюцца паводле адпаведных артыкулаў Крымінальнага кодэкса Рэспублікі Беларусь”.
“Таму, — працягнуў невядомы, — найбольш разважлівым з вашага боку будзе з’явіцца з пакаяннем у кампетэнтныя органы і пакаяцца. Калі пытанняў не ўзнікла, прапаную лічыць мерапрыемства агульнай прафілактыкі паспяховым”.
“Супрацоўнік КДБ” падключыўся прыкладна на 46-й хвіліне мерапрыемства. Да яго паспелі выступіць Сіўчык і эксперт па кампутарнай бяспецы, якога перапынілі для выступу “арганізатара і фундатара”.
Аксёнаў узяў усю віну на сябе. “Я лічыў, што працаваў з прадстаўніком камісіі Еўрасаюза па бяспецы. Прашу прабачэння перад усімі, каго ўцягнуў у гэтую авантуру. Такога не чакаў”, — сказаў ён.
Паводле слоў тэхнічнага работніка, які абслугоўваў семінар, беларускія спецслужбы маглі зафіксаваць толькі асобы спікераў, але не гледачоў (іх было крыху больш за дзесятак), паколькі камера стаяла ззаду іх.
На рэмарку Сіўчыка, што трэба было параіцца, перш чым пагаджацца на супрацоўніцтва з “галандцам”, Аксёнаў заявіў, што “шмат з кім раіўся”.
Арганізатар падкрэсліў, што Беларускі моладзевы хаб, дзе праводзілася мерапрыемства, не мае да гэтага ніякага дачынення. Гэта ж пацвердзіў “Позірку” кіраўнік БМХ Алесь Лапко.
Тэмамі семінара былі заяўлены грамадская, лічбавая, фінансавая бяспека, а таксама фізічная ахова.
