Польскі суд вынес прыгавор тром беларусам, абвінавачаным па справе аб шпіянажы на карысць РФ
19 снежня, Позірк. Люблінскі акруговы суд (Польшча) 19 снежня вынес прыгавор 14 замежнікам, абвінавачаным у шпіянажы на карысць Расіі. Сярод іх трое грамадзян Беларусі.
Усяго па справе праходзіла 16 абвінавачаных, справа дваіх была выдзелена ў асобную вытворчасць. Абвінавачаны Арцём А. атрымаў самы працяглы тэрмін — шэсць гадоў пазбаўлення волі, абвінавачаная Марыя М. — найменшае пакаранне — год і месяц пазбаўлення волі, усе асуджаныя аштрафаваныя, паведамляе партал Onet.
“Мы мелі справу з сучасным, раней невядомым спосабам вядзення і арганізацыі шпіёнскай сеткі не толькі ў Польшчы, але і ва ўсім Еўрапейскім саюзе”, — цытуе партал словы пракурора Пятра Лапатыньскага.
Паведамляецца, што лідарам групы быў мужчына, які “аддаваў загады праз расійскі месенджар Telegram”. Гаворка ішла, у прыватнасці, аб маніторынгу крытычна важнай інфраструктуры: міжнароднага аэрапорта Жэшув-Ясенка, ваенна-марскога порта ў Гдыні, чыгуначнай станцыі ў Жэшуве, памежных пераходаў з Украінай і ключавых чыгуначных шляхоў, па якіх ва Украіну дастаўлялася зброя і гуманітарная дапамога. Лідар групы нібыта планаваў пусціць пад адхон цягнік з вайсковым транспартам, за што прапанаваў 10 тыс. долараў.
Паводле інфармацыі “Радыё Свабода”, сярод фігурантаў справы акрамя трох беларусаў адзін расіянін, астатнія 12 — грамадзяне Украіны.
16 сакавіка міністр унутраных спраў Польшчы Марыюш Каміньскі паведаміў, што Агенцтва ўнутранай бяспекі затрымала дзевяць замежнікаў паводле падазрэння ў супрацоўніцтве з расійскімі спецслужбамі.
Паводле слоў Каміньскага, доказы сведчаць пра тое, што група займалася маніторынгам чыгуначных маршрутаў. “У яе задачы ўваходзіла выяўленне, маніторынг і дакументаванне паставак зброі, якія ажыццяўляюцца для Украіны, — заявіў міністр. — Падазраваныя таксама рыхтаваліся да дыверсійных дзеянняў, накіраваных на тое, каб паралізаваць пастаўкі абсталявання, зброі і дапамогі Украіне”.
Тады ж адзін з беларускіх прапагандысцкіх тэлеграм-каналаў паведаміў, што трое з дзевяці затрыманых у Польшчы — грамадзяне Беларусі. Гэта Уладзіслаў Пасміцюха (1994 года нараджэння), Марыя Мядзведзева (2004) і Мікалай Маскаленка (1971). Там жа былі апублікаваныя відэазвароты, як сцвярджаецца, сваякоў затрыманых, якія заявілі пра сфабрыкаваны характар справы.
19 кастрычніка ў судзе Познані (Польшча) пачаўся працэс над двума грамадзянамі Беларусі, якіх абвінавачваюць у шпіянажы на карысць беларускай вайсковай выведкі.