Беларускіх спартсменаў не дапусцілі да зімовай юнацкай Алімпіяды

4 студзеня, Позірк. Спартсмены Беларусі і Расіі прапусцяць зімовыя юнацкія Алімпійскія гульні, якія з 19 студзеня па 1 лютага пройдуць у правінцыі Канвонда (Паўднёвая Карэя).

Атлеты дзвюх краін не дапушчаныя да спаборніцтваў нават у нейтральным статусе, паведамляе ТАСС.

Кваліфікацыя на юнацкую Алімпіяду завяршылася ў снежні.

“Ні адзін асобны нейтральны спартмен не кваліфікаваны для ўдзелу ў зімовых юнацкіх Алімпійскіх гульнях 2024 года”, — заявілі ў прэс-службе Міжнароднага алімпійскага камітэта (МАК) у адказ на запыт расійскага інфармагенцтва.

28 лютага 2022 года, праз некалькі дзён пасля пачатку вайны ва Украіне, Міжнародны алімпійскі камітэт заклікаў спартыўныя федэрацыі не дапускаць да спаборніцтваў атлетаў з РФ і Беларусі. Гэтая рэкамендацыя была неадкладна і масава прынятая да выканання, у выніку чаго расийскі і беларускі спорт апынуўся амаль у поўнай ізаляцыі.

25 студзеня гэтага года выканкам МАК пацвердзіў санкцыі, уведзеныя ў дачыненні да Беларусі і РФ праз вайну супраць Украіны, аднак адзначыў, што ніводнаму спартсмену нельга забараняць удзельнічаць у спаборніцтвах “толькі праз ягоны пашпарт”.

28 сакавіка МАК выпусціў заяву, у якой рэкамендаваў міжнародным федэрацыям у відах спорту дазволіць беларусам і расіянам удзельнічаць у міжнародных спаборніцтвах.

Пры гэтым павінен быць выкананы шэраг умоў. Беларускія і расійскія атлеты могуць спаборнічаць “у якасці індывідуальных нейтральных спартсменаў” (без выкарыстання сцяга, гімна і іншай сімволікі сваіх дзяржаў) і толькі ў тым выпадку, калі яны “актыўна не займаліся падтрымкай баявых дзеянняў” і не маюць дзеючых кантрактаў з сілавымі і ваеннымі ведамствамі сваіх краін.

8 снежня 2023 года МАК дапусціў індывідуальных спартсменаў з Беларусі і Расіі да ўдзелу ў летніх Алімпійскіх гульнях 2024 года ў Парыжы ў нейтральным статусе.

З прычыны блізкасці летняй Алімпіяды шэраг адпаведных федэрацый дапусціў беларусаў і расіян да спаборніцтваў пад сваёй эгідай.

Зімовыя Алімпійскія гульні пройдуць у 2026 годзе. У гэтым сегменце спорту міжнародныя федэрацыі менш актыўна прымаюць рэкамендацыі МАК аб рэінтэграцыі атлетаў Беларусі і РФ.